Comics India

#003: மந்திரியை கடத்திய மாணவி – 01 ஆகஸ்ட் 1984

2010-06-30T09:29:00.000-07:00

தமிழ் காமிக்ஸ் அன்பர்கள் சமூகத்திற்கு வணக்கம். திருவிழா கோலங்கள் களைகட்டிய இப்பண்டிகை நாட்களில், யாவரும் உற்றார் உறவினர்களுடன் சந்தோஷமான கட்டங்களை அனுபவித்து கொண்டிருப்பீர்கள் என்று நம்புகிறேன். மழைமேகங்களும் ரம்மியமான ஒரு சூழ்நிலையை அதற்கு ஏற்படுத்தி கொண்டிருக்கிறது.

நிற்க. முன்னுக்கு பின் முரனான வாக்கியங்களாக இருக்கின்றனவே என்று யோசித்தால் அதில் தவறேதும் இல்லை, அதற்கான விளக்கம் பதிவின் கடைசியில் உள்ளது. அதற்கு முன்பு வழக்கமான வேலையை கவனிப்போம்.

சென்ற பதிவுவாக வெளிவந்த ராணி காமிக்ஸ் இதழ்: 2 கவ்பாய் சாகஸத்தின் நினைவுகூறல் நண்பர்களிடையே பெற்ற வரவேற்பிற்கு என் நன்றிகள். வழக்கம் போல உங்கள் கருத்துகளுக்கான என் பதிலை (வழமை போலவே அதுவும் தாமதமாக) அங்கு படிக்கலாம். இனி, நமது இன்றைய பதிவை ஜகுருதியாக காணலாமா...

மாதம் ஒன்றிற்கு ஒரு ஜேம்ஸ் பாண்ட் கதை என்ற பாணியில், அழகியை தேடி’யை தொடர்ந்து, ராணி காமிக்சின் மூன்றாவது இதழாக, பாண்டின் அடுத்த தாக்குதலை தாங்கி வெளிவந்த இதழ் தான், ‘மந்திரியை கடத்திய மாணவி’.

ராணி #3: மந்திரியை கடத்திய மாணவி 007 ஜேம்ஸ் பாண்ட் | 01 ஆகஸ்ட் 1984

இங்கிலாந்தின் சசெக்ஸ் பகுதியில் ஆள் அரவம் இல்லாத ஒரு ஒதுக்குபுரத்தில் ஆரம்பிக்கிறது, பாண்டின் இந்த சாகசம். மற்றவர்கள் கண்களிற்கு சாதாரண ஒரு வீடாக தெரியும் கட்டிடத்தின் உள்ளே, இங்கிலாந்தின் உளவுத்துறை செயலகம் கமுக்கமாக பணியாற்றி கொண்டிருந்தது.

அந்த நள்ளிரவு வேளையிலே, அங்கு நெவ்ஸ்கி நடவடிக்கை என்ற பெயரில் கிடைக்கபெற்ற ஒரு தகவலை பற்றி ஆராய்ந்து கொண்டு அறிமுகமாகிறார்கள், இங்கிலாந்து உளவுத்துறையின் அதிகாரி வில்லியம், மற்றும் அவரது அந்தரங்க செயலாளர் கிரேசி.

அவர்களுக்கு துணைபுரிய துப்புகிடைத்த களத்தில் பணியாற்றி கொண்டிருப்பவர், வேறு யார், நமது சாகஸ ஹீரோ ஜேம்ஸ் பாண்ட் தான். அங்கு ஒதுக்குபுறமாக நிறுத்தபட்டு இருந்த, சந்தேகத்திற்கு இடமான ஒரு ஊர்தியை நோட்டம் இட எத்தனிக்கும் போது, வானத்தில் திடீரென்று தோன்றும் காட்சி அவர் கவனத்தை திசைமாற்றுகிறது.

வானத்தில் இருந்து இறங்கி வரும் தேவதையை போல, ஒரு பெண் உடலில் எவ்வித ஆடையும் இல்லாமல் அவசர கால விமான குடையில் இறங்கி வருகிறார். எந்தவித பரபரப்பையும் முகத்தில் காட்டி கொள்ளாத அந்த விசித்திர பெண், ஊர்தியின் அருகாமையை அடைந்ததும், அங்கு ஏற்கனவே தனக்காக வைக்கபட்டிருந்த ஆடையை எடுத்து அணிய தொடங்குகிறார் (ஜேம்ஸ் மனது என்ன பாடுபடும், அய்யகோ).

என்ன நடக்கிறது என்று ஆராய(?!), ஜேம்ஸ் அப்பெண்ணை நெருங்கும் வேலையில், சிவபூஜையில் கரடி போல உள்ளே நுழைகிறான் ஒரு முரடன். அவனை சமாளிக்க அவனுடன் மோத ஜேம்ஸ் தயாராகும் போது, பின்னால் இருந்து அவரை தாக்க தொடங்குகிறார் அந்த பெண். இருவரின் தாக்குதலில், சற்று நிலை குலைந்தாலும், ஒரு வழியாக அந்த ஆசாமியை கூரிய கட்டை ஒன்றை கொண்டு தாக்கி வீழ்த்துகிறார்.

ஆனால் சாவதற்கு முன், அந்த நபர் அந்த பெண்ணையும் பரலோக பயணத்திற்கு தன் துணைக்கு அழைத்து சென்று விடுகிறான். (பெண்கள் உடன் இருந்தால் பரலோக பயணம் கூட சுகபடும், என்று எந்த போலி சாமியார் அவருக்கு அறிவுரை கூறினாரோ)

அவர்களிடம் இருந்து எவ்வித விஷயத்தையும் கிரகிக்க முடியாமல் போனதை எண்ணி வருந்தும் வில்லியமிடம், அவர்கள் ரஷ்ய மொழியில் பேசி கொண்டதை தெரிவிக்கிறார் ஜேம்ஸ். அதன் அடிப்படையில் நெவ்ஸ்கி என்ற அடைமொழி, அலெக்சான்டர் நெவ்ஸ்கி என்ற பழங்காலத்து ரஷ்யாவின் கிராமப்புற வீரனை குறிக்கலாம் என்றும் கூற்றை எடுத்து வைக்கிறார்.
இந்த மர்மத்தை பற்றி அவர்கள் மேலும் பேசும் முன், கிரேசி கார்ன்வால் என்ற பகுதியில் இரவில் நடமாடும் பேய் வீரன் பற்றிய ஒரு புரளியை அறிய தருகிறார்.

அப்போது, திடீரென்று அலைவரிசை தடைபடும் வானொலி பெட்டி, அவர்கள் கவனத்தை கவர்கிறது. வழக்கமான இசை நிகழ்ச்சியின் நடுவே, திடீரென்று ஒலிக்கும் ஒரு மர்ம குரல், தன்னை இங்கிலாந்தின் ஆர்தர் மன்னர் என்று சூழரைக்கிறது. தொடர்ந்து பேசும் அந்த குரல், 20ம் நூற்றாண்டின் இங்கிலாந்து பிரஜைகளை, தங்கள் பாரம்பரிய பெருமைகளை காக்க வழியுறுத்தி விட்டு, தான் மீண்டும் அவர்கள் முன்பு தோன்றுவதற்கான அடையாளத்தை விரைவில் வெளியிடுவதாக கூறி, முற்றுபெருகிறது.

தொடர்ந்து நடக்கும் விடயங்களை ஒன்று சேர்க்கும் ஜேம்ஸ், இது ஒரு பெரிய சதிவலையின் ஆரம்பமாக இருக்கலாம் என்று கணிக்கிறார். இதற்கிடையே கார்னிவாலில் நிருபர் ஒருவர் அந்த பேய் வீரனை நேரில் கண்டதாகவும், விரட்டி செல்லும் போது, அது மர்மமான முறையில் மறைந்து விட்டதாகவும் தகவல் வந்து சேர்கிறது.

அடுத்த நாள், வில்லியம் மூலம் ஜேம்ஸிடம் முந்தைய தினம் மோதிய ஜோடி, ரஷ்ய உளவாளிகள் என்றும் உலக நாட்டோ கூட்டமைப்பு நாடுகளிடம் விரோத போக்கை கடைபிடிக்கும் ஸ்மெரிஷ் என்ற கும்பலுடன் தொடர்பு உள்ளவர்கள் என்றும் தெரிய வருகிறது. மேலும் இதை பற்றி ஆராய, அந்த ரஷ்ய உளவாளியின் வீட்டிற்கு சோதனையிட செல்லும் ஜேம்ஸை அங்கே மறைந்திருக்கும் மர்ம மனிதன் வீழ்த்தி விட்டு தப்பி ஓடி விடுகிறான். அதற்கு பிறகு நிதானத்திற்கு திரும்பும் ஜேம்ஸ், அங்கு சோதனையிடும் போது சமீபத்தில் உபயோகபடுத்தபட்ட புகைபட கருவி ஒன்று அகப்படுகிறது. மர்ம ஆசாமி தேடி வந்தது அதுவாக தான் இருக்கும் என்று ஜேம்ஸ் அனுமானிக்கிறார். (பெரிய கண்டுபிடிப்புதான், சாமி)

அப்புகைபடங்களை பிரதி எடுத்து பார்க்கையில், அவை பாறைகள் நிறைந்த ஒரு கடற் பகுதியினை சுற்றி படமாக்கபட்டவைகள் என்று புலப்படுகிறது. அந்த இடத்தை இணம் காண, கடற்படைக்கு அனுப்பபட்டிருப்பதாக வில்லியம் ஜேம்ஸுக்கு தெரிவித்து கொண்டிருக்கும் போது, உளவுத்துறை தலைவர் ‘எம்’மிடம் இருந்து இங்கிலாந்து ராணுவ மந்திரி திடீரென்று கடத்தபட்டிருப்பதாக தகவல் வந்து சேருகிறது.

நேட்டோ நாடுகளின் சகல விஷயமும் அத்துபடியான இராணுவ மந்திரி எதிரிகள் கைகளில் அகப்பட்டால் பெரிய ஆபத்து வந்து சேரும், என்று எம் கவலை தெரிவிக்கிறார். நெவ்ஸ்கி நடவடிக்கைக்கு மந்திரி கடத்தல் தான் சாராம்சமோ என்று ஜேம்ஸ் யோசிக்கும் வேளையில், கடற்படை மூலம் அந்த மர்ம புகைபடங்கள் எடுக்கப்ட்ட இடம் கார்ன்வாலை ஒட்டிய பவ்னே துறைமுகபகுதி என்று தெரிய வருகிறது. மர்ம வீரன் தோன்றுவதாக கூறபடும் இடமும் அதுவே என்பதால், நேரில் சென்று துப்பு துலக்க ஜேம்ஸ் புறப்படுகிறார்.

கார்ன்வாலில் முன்பு ஆவியை நேரில் பார்த்தாக கூறபட்ட பத்திரிக்கையாளனை சந்திக்க ஜேம்ஸ் முயலும்போது, அவர் மர்மமான விபத்து ஒன்றில் சிக்கி மருத்துவமனையில் இருப்பதாக தெரிய வருகிறது. அவனை சந்திக்கும் ஜேம்ஸிடம், தன்னை வேண்டுமென்றே சாகடிக்க தான் அந்த விபத்து நடத்தபட்டிருக்கலாம் என்று தெரிவிக்கிறான். அவனிடம் கிடைத்த தகவல்களை கொண்டு, அன்று இரவு ஆவி உலவும் அந்த பிரதேசத்தை சென்றைடையும் ஜேம்ஸ், மறைந்து இருந்து நோட்டம் விட ஆரம்பிக்கிறார்.

சொல்லி வைத்தாற்போல், இரவின் அந்த அந்திம வேளையில் பிரகாசிக்கும் ஒளியுடன் ஆவி வீரன் குதிரையில் ஆரோகணித்து பயணம் செய்கிறான். அந்த மர்ம உருவத்தை பின்தொடர்ந்து செல்லும் ஜேம்ஸ், ஒரு குன்றின் பின்புறம் அது மறைந்து போவதை பார்க்கிறார். அங்கு மேலும் ஆராயும் அவர், சந்தேகித்தபடி அங்கு ஒரு மர்ம குகையின் நுழைவாயில் இருப்பதை கண்டுபிடிக்கிறார்.

அந்த இருட்டு குகையில் வரும் வெளிச்சத்தை நோக்கி பயணிக்கும் ஜேம்ஸ், குகையின் மைய பகுதியில், அந்த ஆவி வீரனும் இன்னொரு இளம் வாலிபனும் இருப்பதை பார்க்கிறார். ஆவி வீரன் தன் பளபளக்கும் கவச உடைகளை கழட்ட, அந்த உருவத்தின் பின் இருப்பது ஒரு இளம் பெண் என்று ஜேம்ஸுக்கு தெரிய வருகிறது. அக்குகை ஒரு கைவிடபட்ட தகர சுரங்கம் என்பதும், அதை உபயோகித்து தான் அந்த பளபளக்கும் வண்ணத்தை கவச உடையில் சேர்த்திருக்கிறார்கள் என்றும் ஜேம்ஸ் கண்டுபிடிக்கிறார்.

அவர்கள் இருவரும் பேசி கொள்வதை வைத்து, இரண்டாவது ஆர்தர் மன்னனின் வருகைக்காக அவர்கள் தயாராகி கொண்டிருப்பதும், டிர்க் என்பவர் கோட்டை ஒன்றில் இவர்களுக்காக காத்திருப்பதும் தெரிய வரும் ஜேம்ஸ், அவர்களை பின்தொடர முனைகையில் அவர்களால் தாக்கபட்டு மயக்கமுருகிறார். சுயநினைவு திரும்பிய போது, தன் துப்பாக்கியும் அவர்களையும் காணாது, குகையின் உள்ளே தேடி கலைக்கிறார்.

பின்பு தன் வாகனத்திற்கு திரும்ப வந்து, வரைபடம் மூலம் அருகில் இருக்கும் ஒரே கோட்டை பென்சில்லி என்று அறிந்து கொள்கிறார். அவர்கள் அக்கோட்டையை தான் குறிப்பிட்டிருக்க வேண்டும் என்று நினைக்கும் ஜேம்ஸ், அவ்விடத்தை நோக்கி விரைகிறார்.

கோட்டை புணரமைப்பு பணியில் இருப்பதாக கூறும் பலகையை சட்டை செய்யாமல், அந்த அழகிய கோட்டையை அடையும் ஜேம்ஸ் அங்கு அவர் தேடி சென்ற இரு நபர்களான, ஆலன் மட்டும் ஸ்வான் உடன் அக்கோட்டையின் இளைய பிரபு டிர்க் என்பவனும், இருப்பதை காண்கிறார். அவர்களுடன் இராணுவ மந்திரி மயக்க நிலையில் கட்டிலுடன் கட்டபட்டிருப்பதையும் காண்கிறார்.

ஜேம்ஸை பார்த்து அதிர்ந்து போகும் அந்த நபர்களிடம் மந்திரியை கடத்திய ராஜ துரோக குற்றத்திற்காக கடுமையான தண்டனை பெற முடியும் என்று எச்சரிக்கிறார், ஜேம்ஸ். ஆனால், அந்த மூவர் கூட்டணியோ, தாங்கள் எந்தவித விரோத போக்கிற்காகவும் இவ்விடயங்களை செய்யவில்லை என்றும், இங்கிலாந்தை நல்வழிக்கு அழைத்து செல்ல வேண்டுமானால், ஆர்தர் மன்னர் போல தோன்றி ஒரு அதிர்ச்சி வைத்தியம் கொடுப்பதற்காகவே, இச்செயல்களை அவர்கள் செய்ய துணிந்தார்கள் என்றும் அறிய தருகிறார்கள்.

ஆனால் ஜேம்ஸ் இவர்களை பகடை காய்களாக பயன்படுத்தி, பின்புறத்தில் ஒரு பெரிய ஸ்தாபனம் இருக்க வேண்டும் என்று அவர்களுக்கு புரிய வைத்து கொண்டிருக்கையில், மர்மமான முகமூடி அணிந்த ஒரு கும்பல் அங்கு அதிரடி பிரவேசம் செய்கிறது. ஜேம்ஸ் அவர்களிடம் இருந்து தப்பித்தாலும், டிர்க்கும், ஆலன், அவர்கள் குண்டுக்கு இரையாகிறார்கள். அந்த சந்தர்பத்தை பயன்படுத்தி அக்கும்பல் இராணுவ மந்திரியை கடத்தி சென்று விடுகிறது.

அக்கும்பல் அவ்விடத்தை விட்டு அகன்றவுடன் திரும்ப வந்து சேரும் ஜேம்ஸ் (என்ன ஒரு டகால்டி பேர்வழி?), ஸ்வான் ஆடைகள் கழையபட்டு, மந்திரிக்கு பதிலாக அக் கட்டிலுடன் பிணைக்கபட்டிருப்பதை காண்கிறார் (காணா கண் கொள்ளா காட்சி ஆச்சே அது. அப்பதுமையை சிதைக்காத விரோதிகள் வாழ்க).

எஞ்சிய பக்கங்கள் ஜேம்ஸ் மர்ம கும்பலை மடக்கி பிடித்தாரா ? அவர்களின் விபரீத நோக்கங்களை வெளிக்கொணர்ந்தாரா ? அவர்கள் பிடியில் சிக்கி தவிக்கும் இராணுவ மந்திரியை காப்பாற்றினாரா ? அவர் கூடவே நிழலாக தொடர போகும் இளம் பெண் ஸ்வான் அவருக்கு உதவியா இல்லை உபத்தரவமா ? என்ற கேள்விகளுக்கு நேரத்துடன் போட்டி போட்டு நடக்கும் பரபரப்பு காட்சிகளில் விடை அளித்திருக்கிறார்கள், ஜேம்ஸின் பல சாகஸங்களுக்கு உயிர் கொடுத்த அதன் கர்த்தாக்கள், ஓவியர் யாரோஸ்லவ் ஹோரக், மற்றும் எழுத்தாளர் ஜிம் லாரண்ஸ்.

சாதாரண விளையாட்டாகவோ, இல்லை புரட்சிகரமான செய்கைகளினாலோ சமுதாயத்தில் மாற்றத்தை உண்டு பண்ண நினைக்கும் அக்கால இளைய சமுதாயத்தினருக்கும் சரி, இக்கால இளரத்தங்களுக்கும் சரி, தீர ஆராயமல் செய்யப்படும் அச்செயல்களினால் ஏற்படும் பேராபத்தை சுட்டிகாட்டும் சாகஸமாக பாண்டின் இக்கதை ரசிகர்களுக்கு பரிச்சயமாகிறது.

இக்கதை ஜனவரி 16, 1976 ல் இருந்து ஜுன் 1, 1976 வரை இங்கிலாந்தின் டெய்லி எக்ஸ்பிரஸில் ஹாட் ஷாட்ஸ் (Hot-Shots) என்ற பெயரில் வெளியான ஒரு சித்திர தொடர் ஆகும். வழக்கமான இயான் ப்ளமிங்கின் ஜேம்ஸ் பாண்ட் நாவல் வடிவங்களில் இருந்து விலகி, எழுத்தாளர் ஜிம் லாரண்ஸ் தானாக எழுதிய கதைகளில் இதுவும் ஒன்று.

ரசிகர்களுக்கு மிகவும் பரிச்சயமான ஹோரக்கின் அட்டகாசமான சண்டை காட்சிகளின் தத்ரூப வடிவங்களுடன், முந்தைய இதழ் போலவே இந்த கதையிலும் சண்டைகளில் ஜேம்ஸ் பதுங்கி பாயும் புலியாக உருவகபடுத்தியிருக்கிறார், எழுத்தாளர் லாரண்ஸ். எதிராளிக்கு பதிலுக்கு பதில் கொடுத்தாலும், முக்கிய கட்டங்களில் அவரை வீழ்த்தி எதிராளிகள் தப்பிப்பதாகவே காட்டபட்டிருக்கிறது.

சொல்ல போனால் இளைஞர்களான ஆலன், ஸ்வான் கைகளில் கூட அவருக்கு அதே நிலைமை தான் என்று பார்க்கையில் அவர் மேல் பரிதாபம் பட தோன்றுகிறது. ஆனால், செய்தி தாள் தொடராக வந்த இச்சித்திரக்கதை தொடரில், இப்படிபட்ட கட்டங்கள் தான் ரசிகர்களை ஒவ்வொரு நாள் சித்திர பட்டிகளை ஆவலுடன் எதிர்பார்க்க வைக்கும் என்பதை நினைக்கையில், அவற்றை மன்னித்து விட்டு விடலாம்.

ஆவி மனிதனை அவர் நெருங்கும் அக்காட்சிகள், சிறு வயதில் நான் இந்த புத்தகத்தை படித்த போது ஒரு பெரிய எதிர்பார்ப்பையும், கிலியையும் ஏற்படுத்திய கட்டங்கள். ஆனால், இக்காலத்தில் அவைகளை மீண்டும் படிக்கையில், அது அப்படி ஒரு உணர்வை கொண்டு வராமல் இருப்பது நமது முதிர்ச்சியின் விளைவாக இருக்கலாம்.

வழக்கம் போல இத்தொடரிலும், ஜேம்ஸுக்கு அவர் மச்ச பலன் படி அழகிகள் எதிரிகள் ரூபத்திலும், சாகஸ துணைவிகளாகவும் கிடைத்த வண்ணம் இருக்கிறார்கள். இளம் பெண்களை தவிர அவரின் வாழ்க்கையில் வேறு பெண்களுக்கு இடம் இல்லாமல் பார்த்து கொள்கிறார் கதாசிரியர். அதற்கு பக்கபலமாக அவைகளை உருவகபடுத்துவதில் அதிக சிரத்தையுடன் பணிபுரிகிறார், ஹோரக். (மனிதருக்கு அழகிய யுவதிகளையும், ஜேம்ஸையும் அச்சர சுத்தமாக வரையும் போது வரைகலன் ஆனந்த தாண்டவமாடுகிறது)

ஆனால், அந்த அழகிய மேனிகளில், இம்முறை நமது ராணி காமிக்ஸ் குழுமம் தங்கள் வேலையை காட்டியிருப்பார்கள். அழகியை தேடி’யை போன்ற காட்சிகள் இக்கதையிலும் அடங்கி இருந்தாலும், அதற்கு மூலாம் பூசும் வேலைகளை அங்கங்கே தவறாமல் செய்து விட்டார்கள். குழந்தைகளை சென்றைடைய வேண்டிய புத்தகம் என்ற எண்ணம் அவர்களுக்கு மேலோங்கி இருந்ததற்கான அறிகுறி அது என்று கொள்ளலாமா?

ஆனால் ஜேம்ஸ் பாண்டிற்கே உண்டான தனி கவர்ச்சியை அவர்களால் மறைக்க முடியுமா? கடைசி காட்சிகளில், வழக்கம் போல தன் வேலையிலேயே கண்ணாக ஜேம்ஸ் முடிக்கும் கட்டம் - ‘ஏ1’ (சோதிக்காமல் மனிதர் எதையும் விட மாட்டாரே) , என்றால் அதற்கு தமிழ் மொழியாக்கம் டாப் டக்கர்.

கதையின் போக்கில் ஜேம்ஸ் படிக்கும் பேப்பரின் பெயரை பார்த்தீர்களா? அப்போது ஆங்கில மூலத்திற்கு உண்மையாக மொழிபெயர்த்திருக்கும் ராணி நிர்வாகம், பிற்பாடு ஜேம்ஸை தினத் தந்தி யெல்லாம் படிக்க வைத்தது இன்னொரு கதை.

ஆனால், இந்த இதழுடன் ராணி நிர்வாகம் ஒரு புதுமையை அறிமுகபடுத்திற்று. கதையின் ஆரம்பத்தில், கதையின் முக்கிய கதாபாத்திரங்களை வரிசையாக நமக்கு ஒரே பக்கத்தில் அறிமுகபடுத்தியிருப்பர். ஓவியங்களை இணங்கண்டுகொள்ள முடியாத அந்த சிறுவயதில், கதையின் போக்கே படித்து கொண்டு செல்கையில் வில்லியம் என்றால் யார்? எம் என்றால் யார்? என்று தெரிந்து கொள்ள இப்பக்கம் உதவியாக இருந்தது என்பதை கூறுவதில் தயக்கம் இல்லை. இப்பாணியை பிற்பாடு அனைத்து ஜேம்ஸ் கதைகளுக்கும் தொடர்ந்து பயன்படுத்தியது ராணி குழுமம்.

அதோடு இல்லாமல், வழக்கமான விளையாட்டுப் பக்கங்களுடன், முதல் முறையக வாசகர்களின் கடிதங்களும் அறிமுகமானது இவ்விதழில் இருந்து தான். ராணி காமிக்ஸை பற்றி உருகி உருகி கருத்திட்டிருக்கும் இந்த அன்பர்களில் சிலராவது இன்னும் சித்திரக்கதைகளுக்கு ரசிகர்களாக இருப்பார்கள் என்று நம்புகிறேன்.

அவர்கள் கருத்திட்ட ராணியின் முதல் இதழான, அழகியை தேடியை பற்றிய நமது முந்தைய பதிவை நீங்கள் இங்கே படித்து கொள்ளலாம்.

வழக்கம் போலவே சிறப்பு விளம்பர பகுதிகள் இந்த இதழிலும் பின்னட்டையை அலங்காரம் செய்யும் போது, முன் அட்டையின் உள்ளே, இந்த சமயம் இடம் பிடித்து கொண்டது, ராணி நிர்வாகத்தின் இன்னொரு வெளியீடான ராணி வார இதழ். தற்போதும் இந்த புத்தகம் வெளிவருவதாக தான் நினைக்கிறேன். தெரிந்தவர்கள் பகிர்ந்து கொள்ளலாமே?

இதழ்களின் இச்சிறப்பு அம்சங்களுக்கு முழு முதல் காரணம் ஆசிரியர் திரு.ராமஜெயம் அவர்கள் தான். புத்தகத்தின் ஒவ்வொரு பக்கத்தையும் சிரத்தையுடன் அழகாக வடிமைப்பதில் அவர் காட்டிய அக்கறை வார்த்தைகளில் வடிக்க முடியாதது. தற்போது அவர் ஆள் அரவம் இல்லாமல் இருப்பது தமிழ் பத்திரிக்கைகளின் பேரிழப்புதான் என்றே சொல்லலாம்.

வழக்கம் போல, அடுத்த ராணி காமிக்ஸ் இதழின் விளம்பரம், இப்புத்தகத்திலும் இடம் பிடிக்கிறது. ஒரு புது மாதிரியாக தப்பி ஓடிய இளவரசி என்னும் ஒரு சித்திர கதைக்கான விளம்பரம், வாசகர்களின் கவனத்தை திருப்பி இருக்கும் என்பதில் ஐயமில்லை. அந்த கதையை படிக்க ஆவலுடன் நானும் காத்திருந்தேன். நமது அடுத்த பதிவில், அந்த இரண்டு இளம் தளிர்களின் போராட்டத்தின் நினைவுகளை நாமும் அசை போடலாம் நண்பர்களே.

அது வரை, இந்த இதழில் வெளிவந்த குறுக்கெழுத்து போட்டியை முயன்று பாருங்களேன். அதற்கான விடை இந்த புத்தகத்திலேயே வெளிவந்திருந்தாலும், அதை அடுத்த பதிவோடு பகிர்கிறேன். (கொஞ்சம் முயன்றுதான் பாருங்களேன்)

இத்துடன் நமது ராணி காமிக்ஸின் மூன்றாம் இதழின் நினைவுகூறல் முடிவடைகிறது, நண்பர்களே.

இனி வாக்களித்தபடி, முதல் பத்தியில் இருக்கும் முண்ணுக்கு பிண்ணான வார்த்தைகளுக்கு விளக்கம் – அது கிட்டதட்ட ஒரு வருடம் முன்பு இப்பதிவை நான் எழுத ஆரம்பித்த போது இருந்த காலத்தை ஒட்டியது என்பதே. கடைசியாக இப்பதிவேடில் நான் ஒரு பதிவை இட்டு ஒரு வருடம் ஆகி விட்டது என்று எண்ணும் போது ஆச்சர்யமாக இருக்கிறது. கூடவே, என்னை நானே திட்டி கொள்ளவும் செய்கிறேன்.

உண்மையில் கூற போனால், அலுவலகம் மட்டும் தனிபட்ட வேலைகளில், இரு பதிவேடுகளை பேணி காப்பதில் இருந்த கஷ்டங்களே அதற்கு காரணம். நடுவில் எப்பாடு பட்டேனும் இப்பதிவை பூர்த்தி செய்து விட வேண்டும் என்ற எண்ணத்தில், அவசர கதியில் இப்பதிவு பாதி பூர்த்தியாகியபடி பல முறை தளத்தில் பள் இளித்து விட்டது. அதை நம்பி ஆசையுடன் படிக்க வந்து ஏமாந்து போன ரசிகர்கள் அனைவரிடமும் மன்னிப்பு கேட்டு கொள்கிறேன்.

நான் கடைசியாக இங்கே பதிவிட்ட போது பின்தொடர்பாளர்கள் பட்டியலில் இருந்தவர்கள் வெறும் 20 பேர். இன்று அதன் எண்ணிக்கை 50 ஐ தாண்டி விட்டது. என் சோம்பேறித்தனத்தை உடைத்து, மீண்டும் இத்தளத்தில் நான் பதிவிட வேண்டும் என்ற எண்ணத்தை உண்டு பண்ணியது, இத்தகைய வாசகர்களின் ஆதரவே.

இப்பதிவேடை நான் கை விட்டு விடவில்லை என்பதை நிரூபிக்க புதிய பல மாற்றங்களை பதிவேடின் அமைப்பில் சேர்த்திருக்கிறேன். அதோடு, இனி சீரான இடைவேளையில் பதிவுகளை பதிவேற்றம் செய்ய உறுதியான முடிவையும் எடுத்துள்ளேன். எப்போதும் போல உங்கள் ஆதரவை, ராணி காமிக்ஸுடனான உங்கள் அனுபவங்களை இத்தளத்தில் பகிர்ந்து கொள்ளுவதின் மூலம் நீங்கள் தெரியபடுத்தினால், மிகவும் சந்தோஷபடும் நபர்களில் நானும் ஒருவன் என்று கூறி, இப்பதிவை முடிக்கிறேன்.

மீண்டும் அடுத்த ராணி காமிக்ஸ் விமர்சன பதிவில் சந்திப்போம் தோழர்களே. நன்றி.

#002: பாலைவனத்தில் தண்ணீர்! தண்ணீர்! – 15 ஜுலை 1984

2009-05-17T11:45:00.000-07:00

காமிக்ஸ் அன்பர்கள் சமூகத்திற்கு வணக்கம். சென்ற பதிவாக வெளிவந்த ராணி காமிக்ஸ் முதல் இதழ் நினைவுகூறல் நண்பர்களிடையே சரியான வரவேற்பை பெற்றதில் மிக மகிழ்ச்சி. வழக்கம் போல உங்கள் கருத்துகளுக்கு என் பதிலை அங்கு படிக்கலாம். ஏற்கனவே தாமதமாக தயாராகிய இரண்டாம் இதழ் விருந்து, கெட்டு போகும் முன் சுவைத்து விடலாம்.

சுட்டெரிக்கும் வெயில் இந்திய நகரங்களை வாட்டி வதைத்து கொண்டிருக்கும் தருணத்தில், சூரியனின் வெப்ப பார்வையில் தகிக்கும் பாலைவனத்தை மையமாக கொண்டு வெளிவந்த இந்த கவ்பாய்* சித்திரகதையை நினைவுகூர்வது சரியாக இருக்கும் என எண்ணுகிறேன். (சரி சரி, ஏற்கனவே தாமத பதிவு அதற்கு சப்பை கட்டு வேறயா என்று கூறுவது கேட்கிறது. அரசியல்ல இதெல்லாம் சகஜமப்பா)

* Cowboy என்ற சொல்லுக்கு “மாட்டு பையன்” என்று கூறலாம் என்றாலும், அவ்வார்த்தைக்கு நம் நடைமுறையில் அர்த்தம் சரி வராது என்பதால் கவ்பாய் என்றே அழைப்போமே?

#2: பாலைவனத்தில் தண்ணீர்! தண்ணீர்!கவ்பாய் சாகஸம் - 15 ஜுலை 1984

அமெரிக்க வரலாற்றில் கவ்பாய் சாகச வீரர்களுக்கு ஒரு மிக பெரிய பங்கு உண்டு. பூர்வ குடிமக்களை அடக்கி ஒடுக்கி அவர்கள் இடங்களில் ஆக்ரமிப்பு செய்து, ஒரு அரசாங்கத்தை கட்டி காப்பாற்ற அவர்களுக்கு பக்க பலமாக இருந்தது, இந்த குதிரை ஓட்டிகள்தான்.

நாட்டை காப்பாற்ற போர்கள வீரர்கள் என்றால், சட்டத்தை நிலை நாட்ட அவர்கள் நம்பியது ஷெரீப், மார்ஷல் என்ற பதவிகளுக்கு அவர்கள் நியமித்த கவ்பாய் வீரர்களையே.

மார்ஷல் என்பவர் மாநிலங்களின் தலைவராக செயலாற்றும் போது, அவருக்கு உதவியாக பிராந்தியங்களின் காவல் தலைவராக ஷெரீப் செயல்படுவார்.

மக்களுடன் ஒன்றி அவர்களை சட்டத்திற்குப்பட்டு காரியம் ஆற்ற செய்வது அவர்களின் தலையாய கடமையாய் இருந்தது.

ஜேம்ஸ் பாண்ட் கதைகளை மட்டும் வைத்து காலம் ஓட்ட முடியாது என்று புரிந்து கொண்ட ராணி நிர்வாகம், தங்கள் முதன்மை கதாநாயகனின் சாகசங்களிடையே இடை சொருகலாக உபயோகபடுத்த தேர்ந்தெடுத்தவையே கவ்பாய் கதைகள்.

இப்படிபட்ட கதைகளத்தை கொண்டிருந்த அந்த கவ்பாய் காலகட்டத்தை ஒட்டி தீட்டபட்ட பல கதைகளிள் ஒன்றே, இந்த “பாலைவனத்தில் தண்ணீர் தண்ணீர்” என்ற ராணி காமிக்ஸின் இதழ். இனி கதையை அலசுவோம்.

சூரியனின் வெப்ப பார்வையில் குளித்து கொண்டு, கண்ணுக்கு எட்டும் தொலைவுமட்டும் மண் குன்றுகளும், கள்ளி செடிகளும் நிறைந்த ஒரு மொட்டை பாலைவனத்தில், இரு உருவங்கள் மெதுவாக தங்கள் குதிரையில் சவாரி செய்த படியே அறிமுகமாகின்றனர். அவர்களில் ஒருவர் பிராட் பிளின்ட். சில்வர் பெண்ட் என்ற பிராந்தியத்தின் ஷெரீப் பொறுப்பில் காரியம் ஆற்றி கொண்டிருப்பவர்.

அவருடன் சக பயணியாக-கைதியாக, பயணிக்கும் ஆசாமி, நிக் மன்றோ. கிட்டதட்ட 30க்கும் அதிகமான கொலைகளை செய்த படு பாதகன், 19 வயதே நிரம்பியவன் என்பது இன்னொரு கொடுமை. குற்றவாளி என்று பட்டம் கட்டபட்ட அவனை, சலிணா பால்ஸ் என்ற நகரத்தில் உள்ள மார்ஷல் ஆபிஸில் ஒப்படைக்கவே இந்த நெடிய பயணம்.

அந்த சுட்டெரிக்கும் வெயிலின் நடுவே கூட நிக்கின் முகத்தில் இருந்த வெறுப்பு சற்றும் குறையவில்லை. தன்னை காப்பாற்ற அவன் அண்ணன்கள் பார்ட்டும், கெப்பும் கட்டாயம் வருவார்கள் என்று ஷெரீப்பை மிரட்டி பார்க்கிறான்.

உன்னை விட பெரிய கொலையாளிகள் அவர்கள் கிடையாது, எனவே நீ அடக்கி வாசிக்கலாம் என்று ஷெரீப் கடுமையாக கூறி அவன் வாயை அடைப்பதின் மூலம் ஷெரீப் தன் ஆளுமைய நிரூபிக்கிறார்.

அடங்கி ஒடுங்கும் நிக், வெறு வழியின்றி வெறுப்புடன் அவரை தொடர்கிறான். சற்று தூரமே சென்றிருக்கையில், ஆள் அரவம் இல்லாத அந்த பிராந்தியத்தில் எதிரொலிக்கும் துப்பாக்கி சத்தம் அவர்கள் கவனத்தை திசை திருப்புகிறது.

மிகுந்த கவனத்துடன் ஒரு குன்றின் மீதிருந்து நோட்டம் விடும் ஷெரீப் கீழே பள்ளத்தாக்கில் செவ்விந்தியர்கள் ஒரு சாரட்டு வண்டியை சூரையாடி கொண்டிருக்கும் அக்கிரமத்தை காண்கிறார்.

நிக்கை ஒரு கற்றாலையுடன் பிணைத்து விட்டு, தன் உயிரினையும் பொருட்படுத்தாது, அந்த வெறி பிடித்த கும்பலின் நடுவே சீற்றத்துடன் புகுந்து, வண்டி காவலாளியுடன் கைகோர்த்து போராடுகிறார்.

எண்ணிக்கையில் அதிகமான செவ்விந்தியர்களிடம் வீழ்வது உறுதி என்று நினைத்து கொண்டிருக்கையில் ஆபத்பாந்தவன் போல வந்து சேருகிறார்கள் ரோந்து படை வீரர்கள். வீரர்களை கண்ட மாத்திரத்தில் செவ்விந்தியர்கள் சிதறி ஓடி போக, ஒரு வழியாக அந்த போராட்டம் நிறைவடைகிறது.

வண்டியில் இருந்து வெளிவரும் வாரன் என்ற கணவான், அவரின் அழகு மனைவி லாரா (அது எப்படி கணவான்களுக்கெல்லாம் அழகிய மனைவிகளே கிடைக்கிறார்கள் என்ற ரகசியத்திற்கு யாராவது பதில் கூறினால் தகும்), சகிதம் ஷெரீப்பின் உதவிக்கு நன்றி தெரிவித்து கொள்கிறார், கூடவே அவர்களும் சலீனா பாக்ஸுக்கு தான் பிராயணம் செய்து கொண்டிருப்பதாக தெரிவிக்கிறார்.

ஆனால், இனியும் இந்த பிராந்தியத்தில் வண்டி ஓட்ட போவதில்லை என்று கூறி வண்டியோட்டி விலகி கொள்கிறான்.

வாரனின் கெஞ்சலுக்கு பிறகு, வேறு வழியில்லாமல், ஏற்கனவே ஒரு கைதியுடன் பயனித்து கொண்டிருந்தாலும், இவர்களையும் துணை பயணிகளாக கொண்டு செல்ல ஒப்புக்கொள்கிறார் ஷெரீப்.

ஆனால், வழியில் செவ்விந்தியர்கள் தொந்தரவில்லாமல் பயணிக்க பாலைவனத்தின் ஊடே செல்வது தான் சிறந்தது என்று கூறி கடினமான பயணத்திற்கு அவர்களின் ஒப்புதலை நல்கி கொள்கிறார்.

பிரயாணத்திற்கு தேவையான தண்ணீர் மற்றும் குதிரைகள் ஏற்பாடு செய்து கொண்டு கிளம்பும் வேளையில், லாராவும் வாரனும் தங்களுக்குள் இந்த பயணம் தேவைதானா என்று வினவி கொள்கிறார்கள். வாரனின் கருத்த முகம் அவர்கள் ஏதோ உண்மையை ஷெரீப்பிடம் இருந்து மறைக்கிறார்கள் என்று பறை சாட்டுகிறது. ஆனாலும் லாராவின் வற்புறுத்தலின் பேரில், அந்த நால்வர் கூட்டணி பாலைவனத்தின் ஊடே தங்கள் நெடிய பயணத்தை தொடர்கிறது.

எதிர்பார்த்தபடி அந்த கடிய பயணத்தில் நால்வர் கூட்டணி தவித்து போய் விடுகிறார்கள். நடுவில் நிக்கின் ஏளன பேச்சு ஷெரீப்பை கடுப்பேற்றினாலும், தன் கடமையை நினைத்து அவர் பொறுமை காக்கிறார். ஒரு கட்டத்திற்கு மேல் தண்ணீரும் தீர்ந்து போய் அவர்கள் வெயிலில் தவிக்கும் சூழல் உருவாகிறது.

அப்போது ஷெரீப் 15 மைல் தொலைவில் ஒரு ஊற்று இருப்பதாக கூற, ஆவலுடன் அதை தேடி, நடைபிணமாக தொடருகிறார்கள்.

பாதி உயிருடன் தட்டு தடுமாறி அந்த ஊற்றை அவர்கள் சென்றடையும் போது விதி அங்கு வறண்ட ஊற்றுகண்ணாக அவர்களை பார்த்து சிரிக்கிறது.

இக்கட்டத்தில் நமது பொறுப்பாசிரியரான திரு.ராமஜெயத்தின் மொழி பெயர்ப்பை பாருங்கள். வெயிலின் கொடுமையை கவிதை வரிகளின் பிரதிபலித்திருப்பார். போற்றபட வேண்டிய விஷயம்.

நா வறண்டு கிடக்கும் நால்வரின் மத்தியில், இருந்த கொஞ்சம் நீரை பெண்ணான லாராவுக்கு தருவதாக முடிவு செய்ய, நிக்கின் திடீர் தடங்கலால், அந்த நீரும் தரையின் வெப்பத்தில் சிதறி பஸ்பமாக போய் விடுகிறது. தண்ணீர் தாகத்தில், மனநிலை பாதிக்கபடும் நிலைக்கு கூட நிக் சென்று விட அவனை சமாளிக்க அடித்து மயக்கத்தில் கொண்டு செல்கிறார் ஷெரீப்.

நிலைமையை சமாளிக்க சற்று தொலைவில் இருக்கும் திரீ போர்க்ஸ் என்ற நகரத்தை அடைய யோசனை தெரிவிக்கும் ஷெரீப், நிமிர்ந்து பார்க்கையில் வாரனின் துப்பாக்கி தன்னை குறி வைப்பதை கண்டு அதிர்ச்சி அடைகிறார்.

சூதாட்ட பணத்தை தேட்டை போட்டதற்காக, வாரன் அந்நகரத்தில் தேடபடும் குற்றவாளி என்று தெரிவிக்கிறான். அதில் இருந்து தப்பவே அவர்கள் ஊரை விட்டு வேக வேகமாக வெளியேற முயல்வதையும் விளக்குகிறான்.

அவருக்கு உரிய நியாயத்தை வாங்கி தருவதாக கூறும் ஷெரீப்பை துப்பாக்கி முனையில் மிரட்டி சலினா பால்ஸுக்கே பிரயாணம் செய்ய வலியுறுத்துகிறான். கோபத்தில் அறிவு மங்கி விட்ட வாரனிடம் வாதம் செய்வதால் பயனில்லை, என்று உணர்ந்து கொள்ளும் ஷெரீப் அவன் சொல்படி பிராயணத்தை தொடர்கிறார்.

வழியில் எதிர்படும் செவ்விந்திய கும்பல் ஒன்றின் தாக்குதலை முறியடித்து, நகரத்தை ஒரு வழியாக அவர்கள் அடையும் நேரத்தில், நிக்கின் அண்ணன்கள் அனுப்பிய கைத்தடிகள் அவர்களை தாக்குகிறார்கள்.

அவர்களை எப்படி சமாளித்தார்கள்? சலீனா பால்ஸில் காத்திருக்கும் நிக்கின் அண்ணன்கள் என்ன திட்டம் வகுத்திருக்கிறார்கள்? தண்ணீரில்லாமல் துவண்டு போன கட்டத்திலும் தன் கணவனை காப்பாற்ற பிரய்யத்தனம் செய்யும் லாராவின் கதி என்ன? அவள் கனவன் காப்பாற்றபட்டானா?

இவர்களுக்கிடையே மாட்டி கொண்டு விழிக்கும் ஷெரீப்பின் நிலை என்ன? நிக்கிற்கு தண்டனை கிடைத்தா? என்ற பல கேள்விகளுக்கு விருவிருப்பாக விளக்கம் சொல்கிறது, இந்த 68 பக்கங்கள் கொன்ட ராணி காமிக்ஸின் இரண்டாம் இதழான கவ்பாய் காவியம்.

தண்ணீரின் முக்கியத்துவம், அதற்காக நடக்கும் போராட்டம் என்று நகரும் இந்த கதையில், வேவ்வேறு வாழ்க்கை முறையில் வளர்ந்த நபர்களின் ஊடே நடக்கும் உணர்ச்சி போராட்டம், நடுநடுவே துப்பாக்கி சண்டைகள் மிகவும் உயிரோட்டத்துடன் அமைந்து இருக்கும்.

மனிதனின் இன்றியமையாத தேவைகளிள் ஒன்றான தண்ணீர் கிடைக்காத பட்சத்தில் ஒருவன் மனநிலை கூட பாதிக்கபடுவான் என்ற உண்மையை உணர்த்தும் கட்டம் அபாரம். கூடவே தவறிழைத்த தன் கணவனை காப்பாற்ற முயலும் பெண்ணாக அறிமுகமாகும லாராவின் கதை சரியாக பின்னப்பட்டிருக்கிறது. கடைசி கட்டத்தில் சலினா பாக்ஸில் நடக்கும் துப்பாக்கி சண்டை திக் திக் ரகம்.

மொத்தத்தில் நான் படித்த முதல் கவ்பாய் கதைகளிள் ஒன்றானது என்பதால் இன்றும் நினைவில் தங்கும் ஒரு புத்தகமாக இது அமைந்திருக்கிறது. திரு. ராமஜெயத்தின் கவிதை வரிகளுடன் பயனித்த இந்த புத்தகம் இன்றும் ரசிகர்கள் மனதில் நீங்கா இடம் பெற்றது என்பதில் எந்த ஐயமுமில்லை. பிற்காலத்தில் வந்த அனைத்து கவ்பாய் கதைகளுக்கும் ஒரு எதிர்பார்ப்பை உருவாக்கிய பெருமை இக்கதைக்கே சேரும்.

இந்த கதையின் இருந்த ஒரே குறை, அமெரிக்க மண்ணின் பூர்வ குடிமக்களான செவ்விந்தியர்களை ஏதோ காட்டுமிராண்டிகள் போல முறைபடுத்தி இருப்பது தான். ஆனால் பெரும்பான்மையான கவ்பாய் கதைகளின் சாராம்சமே அதுதான் என்று இருக்கும் போது, இதை மற்றும் குறை கூறுவானேன்?

இந்த கதையின் மூலம் இங்கிலாந்தில் இருந்து வெளிவந்து கொண்டிருந்த கவ்பாய் பிக்சர் லைப்ரரி (Cowboy Picture Library) என்ற தொகுப்பில் வெளியான ஒரு சித்திரக்கதை.

கிட்டதட்ட 500 புத்தகங்கள் வெளியான அந்த தொடரில் இது எந்த கதை என்று கண்டுபிடிப்பது கஷ்டம் என்றாலும், சற்று தேடுதலில் இந்த இரண்டாம் இதழின் அட்டைக்கான ஒரிஜினல் மாதிரி கிடைத்தது.

ராணி காமிக்ஸின் கண்கவர் அட்டைக்கான காரணம் இப்போது தெரிகிறதா?

அட்டையில் அது நமக்கு மிகவும் பரிச்சயமான கவ்பாய் வீரரான கிட் கார்ஸன் கதை என்று கூறியிருப்பதால், இந்த சித்திரகதை வேறு ஒரு புத்தகத்தின் மொழியாக்கமாக இருக்கலாம். அதை பற்றி மேலும் தகவல்கள் கிடைக்கின் காமிக்கியலில் இந்த பதிவின் ஆங்கில ஆக்கம் சில காலம் கழித்து வெளிவரும் போது பகிர்ந்து கொள்கிறேன்.

பக்க நிரப்பிகளாக கடைசி பக்கங்களிள் வெளியானவை, சென்ற ராணி காமிக்ஸ் முதலாம் இதழை பற்றிய வாசகர் கடிதம், அக்காலத்தில் மிகவும் பிரபலமான வழி கண்டுபிடிக்கும் விளையாட்டு, மற்றும் குருக்கெழுத்து போட்டி.

அவற்றை இங்கே ரசியுங்கள்.

கூடவே வழக்கம் போல அடுத்த இதழாக வெளிவர இருந்த இன்னொரு ஜேம்ஸ் பாண்ட் கதைக்கான விளம்பரம் உள்ளட்டையிலும், இரு விளம்பரங்கள் தாங்கி வெளிவந்த இன்னொரு உள்ளட்டை மற்றும் பின்னட்டையை கண்டு களியுங்கள். புத்தகத்தின் விலையை கட்டுக்குள் வைத்து கொள்ள விளம்பரங்களை உபயோகிப்பதற்கு நிகர் ராணி குழுமம் மட்டுமே, என்பதை மீண்டும் பறைசாற்றும்.

பழைய நியாபகங்கள் துளிர்த்தெழுகிறதா? அந்த சந்தோஷ கட்டத்துடனும், ராணி காமிக்ஸின் 2ம் இதழை பற்றி உங்கள் அனுபவங்களையும், இந்த பதிவினை பற்றிய உங்கள் மேன்மையான விமர்சனத்தையும் படிக்கும் ஆவலுடன், இப்பதிவினை முடித்து விடைபெறுகிறேன்.

அடுத்த ராணி காமிக்ஸ் பதிவில் விரைவில் மீண்டும் சந்திப்போம் நண்பர்களே.

#001: அழகியை தேடி - 01 ஜுலை 1984

2009-03-07T05:59:00.000-08:00

காமிக்ஸ் அன்பர்கள் சமூகத்திற்கு வணக்கம். இரண்டு பாகமாக வெளிவந்த முன்னோட்ட பதிவுகளை (பகுதி 1 மற்றும் பகுதி 2), நீங்கள் ரசித்து இருப்பீர்கள் என எண்ணுகிறேன். அந்த பகுதிகளில் பிண்ணூட்டம் இட்ட அனைத்து காமிக்ஸ் ரசிகர்களுக்கும் என் நன்றிகள். அவைகளுக்கான என் பதிலை நீங்கள் அப்பதிவின் இறுதியில் காணலாம்.

முன்னோட்டத்தை தொடர்ந்து, வெகு நாட்களாக தயாராகும் விருந்து என்று அறிவிப்பில் மட்டுமே நிலைத்து கொண்டு இருந்த ராணி காமிக்ஸின் முதல் இதழை இந்த பதிவின் மூலம் நினைவு கூற போகிறோம்.

ஜூலை 01, 1984: ராணி காமிக்ஸ் தமிழ் காமிக்ஸ் உலகத்தில், தன்னுடைய முதல் பயணத்தை வெற்றிகரமாக தொடங்கிய நாள்.

#1: அழகியை தேடி 007 ஜேம்ஸ் பாண்ட்

தங்கள் முதல் இதழ் முத்திரை பதிக்க வேண்டும் என்று எண்ணிய ராணி குழுமத்தினர், அதற்க்கு ஏற்ப உலக புகழ் பெற்ற துப்பறியும் நாயகன் 007 ஜேம்ஸ் பாண்டின் ஒரு முளூ நீள சாகசத்தை தமிழ் வாசகர்களுக்கு அறிமுகம் செய்து வைத்தார்கள்.

லீலைகளுக்கு பெயர் போன ஜேம்ஸ் பாண்டின் முதல் சாகசத்திற்கு அவர்கள் பூடகமாக சூட்டிய பெயர் "அழகியை தேடி". நமது இந்திய கலைஞர்கள் கையில் உருவான வண்ணமிகு, வழு/வழு முன் அட்டையை பாருங்கள். இதழின் விலையான ரூ.1-50 அதற்கே சரியாக போகும், என்பது என்னுடய தாழ்மையான கருத்து.

ஆசிரியராக பொறுப்பேற்று கொண்ட திரு.ராமஜெயத்தின் இரு பக்க முன்னுரை, மற்றும் ஒரு முளு பக்க ஜேம்ஸ் பான்ட் படத்துடன், தொடங்கும் முதல் மூன்று பக்கங்களை கீழ் காணுக.

இப்போது கதை களத்தை ஆராய்வோம். சுவிட்சர்லாந்தின் ஜுரிச் நகரை ஒட்டிய ஒரு பங்களாவில் ஒய்யார நடை போட்டு கொண்டு அறிமுகமாகிறார் ஜுலி என்ற ஒரு அழகி. அவரை அறியாமல் அவரை இரண்டு ஜோடி கண்கள் நோட்டம் இட்டு கொண்டு இருக்கின்றன. அதில் ஒருவர் நமது ஜேம்ஸ் பாண்ட்.

இது போதாது என்று அவருக்கு பக்கத்தில் இருப்பதும் ஜெசிகா என்ற ஒரு பெண் உளவாளி. இவரை மட்டும் எப்படி அழகிகள் சூழ்ந்து கொள்கிறார்கள் என்று வாசகர்கள் எண்ணி கொண்டு இருக்கும் போதே, ஒரு நீட்டி மடக்கும்(?) உலோக கம்பியின் உதவியுடன் அட்டகாச சாகசம் செய்து மாளிகையிள் நுழைகிறார் பாண்ட்.

உள்ளே சுகமாக குழியல் போட்டு கொண்டு இருக்கும் ஜுலியை மிரட்டி ஆடைகளை களைந்து, அவர் காதலன் ரூபி குடுத்த நெக்லஸ் மட்டும் அணிந்து கொண்டு அவரை ஆர தழுவ கட்டளையிடுகிறார். இந்த கண்கொள்ளா காட்சியை(?!) அவரின் பெண் சகா யாரும் அறியாமல் தூரத்தில் இருந்து புகைப்படம் எடுத்து கொள்கிறார்.

ஏன் இப்படி ஒரு சம்பந்தா சம்பந்தம் இல்லாத ஒரு காரியத்தை பாண்ட் செய்கிறார் என்று நாம் யோசித்து கொண்டு இருக்கும் வேளையில், ரூபி அங்கு வந்து சேருகிறார்.

ஆசையுடன் ஜுலியின் அறையில் நுழையும் ரூபியை தன் மயக்க குண்டின் மூலம் வீழ்த்துகிறார் பாண்ட். பின் இதே பிராயத்தை பயண்படுத்தி கட்டுமஸ்தான உடல் வாகு கொண்ட பார்னி என்ற குண்டு பெண்மணியை அவர் வீழ்த்த முயலும் போது, அவருக்கும் பார்னிக்கும் நடக்கும் சண்டை காட்சிகள் தத்ரூபம்.

பொதுவாக குண்டு ஆசாமிகளை சாதாராணமாக எடை போடும் நபர்களுக்கு இது ஒரு பாடம், என்பதை பாண்ட் உணர்ந்து கொள்ள நேருகிறது.

பார்ணியின் ஆக்ரோஷ தாக்குதலில் நிலை குழைந்தாலும், சமாளித்து அவரை வீழ்த்தி தன் ஹீரோ இமேஜை தக்க வைத்து கொள்கிறார்.

இந்த சண்டை காட்சி தத்ரூபமாக சொல்லபட்டுள்ள இந்த பக்கங்களை பாருங்கள்.

மாளிகையில் இருந்து தப்பிக்கும் நமது ஜோடி, மறைவிடம் வந்து சேருகிறது. பிறகு, ஜுலியிடம் தாங்கள் எடுத்த புகைபடங்களை காட்டி, ரூபிக்கு அவற்றை அனுப்பி வைக்க போவதாக மிரட்டுகிறார். ரூபி ஒரு நாள் முன்பு பரிசளித்த நெக்லஸை அவர் அணிய வற்புறுத்தியது, படம் சமீபத்தில் எடுக்கப்பட்டது என்று ரூபியை உணர வைக்கவே என்று புரிய வைக்கிறார்.

ரூபிக்கு இந்த விஷயங்கள் தெரிந்தால் தான் நிச்சயம் கொல்லபடுவோம் என்று உணரும் ஜுலி, பாண்ட் சொல்படி அவருடன் ஃப்ரான்ஸ் நாட்டின் பாரீஸ் நகரத்திற்கு பயணமாகிறார்.

ஆனால், ஜுலிக்கு தெரியமால் பாண்ட் ரூபிக்கு மர்ம தபால் மூலம் படங்களை அனுப்பி வைக்கிறார். ஜுலி தனக்கு துரோகம் இழைத்தாக கருதும் ரூபி, அவளை பழி வாங்க துடிக்கும் போது ஒரு அனாமதேய தொலைபேசி, ஜுலி மார்க் என்ற தன் காதலனுடன் பாரீசில் தங்கும் விலாசத்தை தகவலாக தருகிறது. ரூபி ஆட்கள் பாரீஸ் சென்றடைகிறார்கள்.

ஆனால், அவர்களே அறியாமல் அவர்களை நோட்டம் இடும் ஒரு பெண்மணி பாண்டுக்கு இத்தகவலை தெரியபடுத்துகிறார். கொலையாளிகள் இருக்கிறார்கள் என்று தெரிந்தும் ஜுலியை அங்கு அழைத்து செல்லும் பாண்ட், கொலையாளிகளிடம் இருந்து காப்பாற்றுவது போல நடித்து, அவரை கண் காணா இடத்துக்கு போய் பிழைத்து கொள்ள அறிவிருத்துகிறார். செலவுக்கு ரூபியிடம் இருந்து தான் கைப்பற்றிய வைர மோதிரங்களை குடுத்தனுப்பி வைக்கிறார்.

இங்கிலாந்தில், பாண்டின் லன்டன் உளவு தலைமை நிலையத்தில், அவருடன் உறையாடும் அதிகாரி வில்லியம், ரூபி தங்கள் நாடகத்தில் ஏமாந்து விட்டதை பற்றி விவாதிக்கிறார்.

ரூபியிடம் இருந்து கையகபடுத்தி இருந்த சங்கேத தகவல்கள் மூலம் அவரின் ஆப்பிரிக்க ஏஜெண்ட் குர்த் பற்றிய விவரங்களை பாண்டுக்கு தெரியப்படுத்துகிறார் வில்லியம். கூடவே, இது சம்பந்தமாக நியூயார்க் வருகை தந்து இருக்கும் டமாரா என்ற நீக்ரோ மாடல் அழகியை சந்திக்கும் படி அறிவுறுத்துகிறார்.

அமெரிக்க நகரமான நியூயார்க் சென்றடைகிறார் பாண்ட். அவருக்கு, அதிரடி பிரவேசத்தை பற்றி சொல்லியா கொடுக்க வேண்டும். அலங்கார போட்டிக்கு தயாராகி கொண்டிருக்கும் டமராவை, அவர் உடை மாற்றும் அறையிலேயே சந்திக்கிறார். அவரிடம் சிற்பியான அவர் தந்தை கார்வர் பற்றி விசாரிக்கும் பாண்ட், நீக்ரோ புரட்சியில் அவர் தந்தையை பகடை காயாக பயன்படுத்தப்படும் சாத்தியத்தை விளக்குகிறார்.

மேற்கொண்டு ரகசியமாக பேச அவர் அறைக்கே (?) அழைத்து செல்லுகிறார் டமாரா. பாண்ட் டமாராவிடம், ரூத் தலைமை ஏற்று நடத்தும் ரூபயத் என்ற அமைப்பை பற்றி விளக்குகிறார். அந்த அமைப்பு மேற்கு கிழக்கு நாடுகளிடைய குற்றவாளிகளை கடத்தும் காரியம் புரிவதாகவும், கார்வர் அவ்வடிபடையிலேயே குர்த் மூலம் அகாராவிற்கு கடத்தபட்டிருக்கலாம் என்று விவரிக்கிறார். இருவரும் ஆப்பிரிக்காவில் உள்ள கானா நாட்டின், அகாரா நகரத்தை சென்றடைகின்றனர்.

அகாராவில் குர்த் சதிவேலைகளுக்கு பயண்படுத்தும் ஓமர் டிரேடிங் கம்பெணியில், தங்கள் அகாரா ஏஜெண்ட் நூகுவாவுடன் பாண்ட் இரவில் துப்பு துலக்க நுழைகிறார். இக்கட்டத்தில், ஜன்னலோரம் இருக்கும் இடி மின்னல் தெய்வம் ஷாங்கோ சிலை, இவர்களை தாக்கும் காட்சி திகிலுட்டும் நிமிடங்கள்.

அதில் இருந்து தப்பும் நம் சாகச ஜோடி, தந்திகள் சிலவற்றை நுண்-படங்கள் எடுத்து கொண்டு திரும்புகிறது. அத்தகவல்கள் மூலம் ஆப்பிரிக்காவில் நீக்ரோ புரட்சி ஏற்படுத்த ரூபி மற்றும் குர்த் காரியமாற்றுவது விளங்குகிறது.

அடுத்த கட்டமாக, குர்த் மூலம் அனுப்பட்டது போல ஒரு பொய் தந்தியில், ஜுலியின் காதலன் மார்க் நீக்ரோ புரட்சிக்கு எதிராக சதி வேலை செய்வதாக, ரூபிக்கு அனுப்பி வைக்கிறார். அவர் எதிர்பார்த்தது போல, ஏற்கனவே ஜுலி மீது வெறியுடன் இருக்கும் ரூபி காணாவிற்கு புறபட்டு வருகிறார்.

அதே போல் குர்திற்கு, காணாவிற்கு தான் மற்றும் சிற்பியின் மகள் டமாரா வர போவதாகவும், டமாராவை குர்த் சந்திக்க வேண்டும், என்று ரூபி மூலம் வருவது போல ஒரு பொய் தகவலை சேர்ப்பிக்கிறார் பாண்ட்.

அவர் எதிர்பார்த்தது போலவே, டமாராவை சந்திக்கும் குர்த், சதி வேலை பற்றி அறியாமல் அவளை அவள் தந்தை இருக்கும் மறைவிடத்திற்கு கூட்டி செல்கிறான். (சமயம் கிடைக்கும் போது எல்லாம் நேரத்தை வீணடிக்காமல் ஜேம்ஸ் “காரியமே” கண்ணாக இருப்பதை இங்கு கவனியுங்கள்).

யாரும் அறியாமல் அவர்களை பின் தொடரும் பாண்ட் மறைவிடத்தை அணுகுகிறார். இந்த கட்டத்தில் காவல் நாய்கள், மற்றும் காவலாளிகளுடன் அவர் மோதும் காட்சிகள் தத்ரூபமாக வரையபட்டிருக்கும்.

காவலாளிகளை சரி கட்டி விட்டு, கார்வரை சந்திக்கும் பாண்ட், அவரிடம் கரும் புயல் என்ற சதி வேலை பற்றி விவரிக்கிறார். ஆனால் கார்வரோ, அது தான் பக்கத்து ஆப்பிரிக்க நாடான பவுண்டா குடியரசுக்காக தயாரிக்கும் ஒரு சிலை தான் என்றும், அதற்காக மட்டும்தான் தன்னை பணியில் அமர்த்தி இருப்பதாக வாதிடுகிறார்.

உண்மையை அறிய சிலை வார்ப்பு தொழிற்சாலைக்கு அவர்களை அழைத்து செல்கிறார் கார்வர். அங்கு சிலைகளை ஆராயும் பாண்ட் அவைகளில் வெடிகுண்டு பொருத்தபட்டதை கண்டு பிடிக்கிறார். பவண்டா குடியரசு தலைவரை கொன்று, அதன் மூலம் கானா நாட்டின் மீது பழி விழ செய்வது.

அதன் தொடர்ச்சியாக வடக்கத்திய சதி என்று பிரகடனபடுத்தி, ஆப்பிரிக்காவில் ஒரு பெரும் போரை மூல செய்வதுதான் கரும் புயல் சதி என்று கண்டு பிடிக்கிறார்.

இதற்கிடையே தான் சூழ்ச்சியில் வீழ்ந்து போனதை உணர்ந்து கொள்ளும் ரூபி தன் அடியாட்கள் சகிதம் வார்பு கூடாரத்தில் பாண்டை மடக்குகிறார். அவர்களிடம் இருந்து தப்பிக்க மின் விளக்குகளை அணைக்கும் பாண்ட், வார்பட கூடத்தில் மறைந்து கொள்கிறார்.

உலையில் உமிழும் உலோக ஜுவாலை ஒளியில் அங்கு நடக்கும் சண்டை காட்சிகள் அபாரம். கருப்பு வெள்ளை சித்திரத்திலும் அதை திறம்பட கையாண்டிருப்பது, கதை சித்திர ஓவியரின் திறமைக்கு ஒரு எடுத்துக்காட்டு. கடைசியில் கபட நாடகம் ஆடி வீழ்த்த முயற்சிக்கும் ரூபியை அவர் உலைக்கலன் உலோக திரவத்தை கவிழ்த்து சாகடிக்கிறார். ரூபியின் கூட்டாளிகளும் சுற்றி வளைக்கபடுகிறார்கள்.

இவ்வழியே கரும் புயல் என்ற பெயரில் நடக்க விருந்த நீக்ரோ புரட்சியை வெற்றிகரமாக தடுத்து சாகஸம் புரிகிறார் ஜேம்ஸ் பாண்ட்.

கடைசி காட்சிகளிள் டமாராவின் உதவிக்கு நன்றி தெரிவிக்கும் பாண்டிடம், டமாரா ஓட்டலுக்கு சென்று வெள்ளை - கருப்பு கலக்கும் கலாசார பரிவர்த்தனை (?) உபசாரத்தை பற்றி சங்கேத அழைப்பு விடுப்பதோடு, மொத்தம் 64 பக்கங்கள் கொண்ட இந்த ராணி காமிக்ஸின், மறக்க முடியாத ஜேம்ஸ் பாண்டின், கண்டம் விட்டு கண்டம் பாயும் (உண்மையிலேயே, ஒரே அர்த்தத்துடன் !!), முதல் சாகஸம் அமர்க்களமாக முடிவடைகிறது.

ஆனால், இந்த கதையில் பாண்டின் செய்கைகள் சற்று ஓவர் ரகமே. கழக கூட்டத்தை சிக்க வைக்க அவர் ஒன்றும் அறியாதே ஒரு பெண்ணை பகடை காயாக பயன்படுத்துவது, அவரை துன்புறுத்துவது போன்ற செயல்கள், பாண்டின் மீது வெறுப்பு வர செய்ய கூடியவை. வில்லியே ஆனாலும், பெண்ணாண பார்ணியை, அவர் சுவரில் அடித்து வீழ்த்துவது இன்னும் கொடூரம். எனக்கு தெரிந்து பாண்ட் இப்படிபட்ட ஒரு கதை கருவில், ஒரு வில்லனை போல பின் எப்போதும் தோன்றியதில்லை.

பிற்பாடு வெளியான பல பாண்ட் கதைகள் அவரின் இமேஜை காமிக்ஸ் ஆர்வலர்கள் மத்தியில் மிகவும் பிரபலபடுத்தியது என்பதற்கு ஆதாரம், சென்ற பதிவில் இடம் பெற்ற ஓட்டெடுப்பில், அவர் வேதாளருடன் (மாயாவி) இன்றும் போட்டி போட்டு கொண்டு முன்னிலை வகிப்பதில் இருந்தே அறிய வருகிறது.

எனக்கு காமிக்ஸை அறிமுகம் செய்த என் அண்ணன், இந்த புத்தகத்தை அது வெளியான சமயத்தில் வாங்கவில்லை. அவர் 2 ம் இதழில் இருந்தே புத்தகங்கள் வாங்க ஆரம்பித்திருந்தார். (அல்லது, வாங்கிய புத்தகத்தை, என் கண்களுக்கு அவர் காட்டாமல் இருந்தும் இருக்கலாம்) அதற்கு காரணம், பிற்பாடு இந்த புத்தகத்தை நான் பழைய புத்தக கடைகளில் வாங்கிய பிறகே தெரிந்தது.

ராணி காமிக்ஸின் முதல் இதழான இதில் அப்பட்டமான நிர்வாண காட்சிகள் ஏராளம். அழகிய மங்கைகள் நேரம் கிடைக்கும் போது எல்லாம், ஆண்கள் சட்டை கழற்றுவதை போல மார்பு கச்சையை கழட்டி விட்டு நடமாடுவதை, தமிழக ரசிகர்கள் எவ்வகையில் ஒப்புக்கொள்வார்கள் என்று அறியாமல், ஓவியங்களை ஒரிஜினல் காட்சிகளுடனே திரு.ராமஜெயம் வெளியிட்டு இருந்தார்.

ஒரிஜினல் சித்திரங்களை சேதபடுத்த கூடாது என்ற எண்ணம் இந்திய அளவில் காமிக்ஸ் பதிப்பகத்தினரினிடம் ஒன்றும் புதியது இல்லை எண்றாலும், தமிழில் இப்படி பிரசுரவமாவது முதல் முறை என்பதால் திரு.ராமஜெயம் பல தரப்புகளில் குட்டு வாங்கி இருக்க கூடும். அதன் பிரதிபலிப்பு இதற்கு அடுத்து வந்த இதழ்களில் நடந்த சென்ஸார் மூலம் நாம் அறியலாம். ஆனாலும், பெற்றோர்கள் இந்த புத்தகத்தை எப்படி ஒதுக்கி இருந்தாலும், இளம் சிறார்களிடம் ராணி காமிக்ஸை பெரிய அளவில் பிரபலப்படுத்த ஒரு காரணியாக, இந்த முதல் இதழ் மாறி இருக்கலாம், என்று இப்போது நாம் நினைவு கூறலாம்.

பள்ளி சிறுவனான எனக்கு அந்த புத்தகத்தை வீட்டில் இருந்து மறைத்து பாதுகாப்பது பிரம்ம பிரயத்தன காரியமாக இருந்தது. இதை சாக்காக வைத்து கொண்டு, பால்ய காமிக்ஸ் நண்பன் ஒருவன், நான் எனது வீட்டாரிடம் மாட்டி கொள்வேன் என்று மிரட்டி, புத்தம் புதிதாக இருந்த இந்த புத்தகத்துக்கு பதிலாக ஒரு மொக்கை காமிக்ஸை பண்ட மாற்று முறையில் தலையில் கட்டி விட்டது இன்னொரு கதை.

இந்த தமிழ் கதை சித்திரத்தின் மூலம், 1975ல் இங்கிலாந்தின் டெய்லி எக்ஸ்பிரஸ் (Daily Express) நாளிதழில் சித்திர தெடர்கதையாக வெளி வந்த த ப்ளாக் ரூபி கேபர் (The Black Ruby Caper) ஆகும். இது, அப்பத்திரிக்கையில் பாண்ட் சித்திர தொடர் கதையின் 3 வது அத்தியாயம். பட கதை வரிசையின் படி 34 வது தொடர். கதாசிரியர் ஜிம் லாரண்ஸ் (Jim Lawrence), மற்றும் ஓவியர் யாரோஸ்லவ் ஹோரக்கின் (Yaroslav Horak) வெற்றி கூட்டணியில் உருவான சித்திரக்கதை.

இத்துடன் ராணி காமிக்ஸின் முதல் புத்தகத்தை பற்றிய இப்பதிவு முடிவுக்கு வருகிறது.

கதையுடன் பயணித்து விமர்சித்ததால் நீண்டு போன இப்பதிவில் கதாசிரியர்களை பற்றி இன்னும் பேசுவதை விட, அவர்களை பற்றி இப்பதிவின் ஆங்கில மொழியாக்கம், தாய் கழகமான காமிக்கியலில் சிறிது காலத்தில் வெளியாகும் போது, மேலும் பார்க்கலாம். மூல கதையின் ஒப்பீடும் அதில் அடங்கும்.

அடுத்த பதிவில் ராணி காமிக்ஸ் இரண்டாம் இதழை பற்றி அலசுவோம்.

ஆசிரியரின் கவிதை வரிகளுடன் முதல் இதழில் உட்பக்கத்தில் வெளியான அதன் விளம்பரத்தையும், பின் அட்டையில், அந்த காலத்தில் மிகவும் புகழ் பெற்ற சூதாட்ட பொழுதுபோக்கான லாட்டரி சீட்டுகள் விளம்பரத்தையும் அருகே காணுங்கள்.

லாட்டரி விளம்பரம் இல்லாமல், அடுத்த இதழ் அறிவிப்பு பின் அட்டையில் வெளி ஆகி இருந்தால், முதல் இதழ் இன்னும் சிறப்பாக இருந்திருக்கும், என்பதில் எந்த ஐயமுமில்லை. ஆனால், பணம் பண்ண நினைக்கும் யுக்தி அல்லவா அது, தினத் தந்தி குழுமத்தினர் அதில் கை தேர்ந்தவர்கள் என்றும் சொல்லத்தான் வேண்டுமா.

முடிவுரையாக, ராணி காமிக்ஸ் வலைபூவிற்கு தாங்கள் தரும் ஆதரவை கண்டு நான் மிகவும் மன மகிழ்கிறேன். இது வரை வெளியான பதிவுகள் அறிமுகம் மற்றும் முன்னோட்டம் தொனியிலேயே இருந்தாலும், வலைபூ தொடங்கிய குறுகிய கால கட்டத்தில், 1000’க்கும் அதிகமான வாசகர்கள் வலைபூவிற்கு வருகை தந்து இருப்பதே, அதற்க்கு சிறந்த சான்று. தாய் மொழியில் நமது அபிமான காமிக்ஸ் பற்றி படிக்க தங்களிடம் இருக்கும் ஆர்வம் அதில் வெளிப்படையாக தெரிகிறது.

தொடர்ந்து உங்கள் ஆதரவை நல்கிட வேண்டும் என்று கேட்டு கொண்டு, கூடவே வருகை தரும் அனைவரும் முடிந்த வரை தங்கள் கருத்துகளை இந்த பதிவை பற்றியும், ராணி காமிக்ஸ் முதல் இதழுடன் உங்கள் அனுபவத்தை பற்றியும், கண்டிப்பாக பதிந்து செல்லுமாறு பணிவுடன் வேண்டி கொள்கிறேன். இந்த வலைப்பூவின் நோக்கமே, அந்த இள பிராய கால கட்டத்தை நினைவு கூறுவது தானே. உங்கள் கருத்துகளை முடிந்த வரை தமிழில் பதிந்தால் இன்னும் சிறப்பு. அதற்கு வலப்பக்க காரணியை உபயோகபடுத்தலாம்.

இப்பதிவை படித்து கால இயந்திரத்தில் பின் நோக்கி பயணம் செய்தது போல நீங்கள் உணர்ந்தால், இந்த பதிவுக்கு உழைத்த நேரம் இனிதே கழிந்தது என்று நான் கருதுவேன். இப்பதிவுக்கான உங்கள் கருத்துகளை படிக்கும் ஆர்வத்துடன், மீண்டும் அடுத்த ராணி காமிக்ஸ் பதிவில் விரைவில் உங்கள் அனைவரையும் சந்திக்கிறேன். நன்றி.

முன்னோட்டம் - II

2008-12-26T04:21:00.000-08:00

காமிக்ஸ் அன்பர் சமூகத்திற்கு வணக்கம். சென்ற பதிவில் ராணி காமிக்ஸ் காலகட்டத்தை வரையறுப்பது பற்றிய எண்ணங்களை பகிர்ந்து கொண்டோம், இப்போது அதை தொடருவோம். அனேகமாக கருத்து பகிர்ந்த ஏனயருடன் என்னுடைய கருத்தும் ஒத்து போவதில் ஆச்சர்யம் இல்லை.

எனவே, என் மதிப்பில், அந்த மூன்று கால கட்டங்கள்:

பொற்க்காலம்: # 1 (ஆகஸ்ட் '84) - # 90 (மார்ச் '88)

திரு.ராமஜெயம் பொறுப்பில் வெளி வந்த முதல் 90 இதழ்கள். தரமான மொழிபெயர்ர்பு, சர்வதேச கதாநாயகர்கள், மட்டும் இல்லாமல் கவ்பாய் கதைகள், போர் காவியங்கள், விஞ்ஞான கதைகள், என்று வீர பவனி வந்த கால கட்டம். முத்து காமிக்ஸின் பாரம்பரியம், மற்றும் லயன் காமிக்ஸின் நவீனத்துவத்துக்கு, சரியான போட்டி கொடுத்த வருடங்கள்.

நான் தமிழ் படிக்க கற்று கொண்ட அந்த ஆரம்ப கால புத்தகங்கள் உட்பட, என்னுடைய வாரம் ஒரு ரூபாய் கை செலவு பணத்தில் என்னால் பெருமையுடன் புது புத்தக கடைகளிலேயே வாங்க முடிந்த இதழ்கள் அடங்கிய காலம்.

அந்த கால கட்டங்களில் லயன் மற்றும் முத்து காமிக்ஸின் 2,3 ரூபாய் விலைகள் அடங்கிய இதழ்கள், என்னை பொறுத்த வரை உயர் குடி மக்களுக்கு விதிக்க பட்டது என்ற எண்ணம் கூட இருந்தது :))

இக்காலத்தில் வெளி வந்த புகழ் பெற்ற கதாநாயகர்கள்
(அவர்கள் அறிமுகம் ஆன வரிசைக்கு ஏற்ப):

ஜேம்ஸ் பாண்ட்James Bond மூன்று குதிரை வீரர்கள்Three CowBoys கிட் கார்சன்Kit Karson டைகர்Tiger

சாகச வீரர் ஜானி மன்னர் பீமா இன்ஸ்பெக்டர் ஆசாத் புரட்சி பெண் ஷீலா

Johnny Hazard King Beema Inspector Aazaad Axa

ப்ரூஸ் லீ பில்லி ராயன்

Bruce Lee Billy Buck Ryan

அனைவரும் எனக்கு பிடித்த கதாபாத்திரங்கள் என்றாலும், மிகவும் பிடிக்கும் என்ற வகையில், என் மனம் கவர்ந்த நாயகர்கள்:

ஜேம்ஸ் பாண்ட் (சந்தேகமே இல்லாமல்),

டைகர் (டொட்ட-டாங் என்று அவர் கூறும் பாங்கே அலாதி),

மூன்று குதிரை வீரர்கள் (ஒற்றை கண் நபர், ஆரம்ப இதழில், வானத்தில் நட்சத்திரம் பார்த்து twinkle,twinkle பாட்டு படிக்கும் கட்டம், இன்றும் நினைவில் தங்கும் விஷயம்)

வசந்தக்காலம்: # 91 (ஏப்ரல் '84) - # 288 (ஜூன் '96)

சந்தேகமே இல்லாமல் திரு.அ.மா.சாமி என்ற "ஆமா சாமி" பொறுப்பற்ற கால கட்டம். ராமஜெயம் விட்டு சென்ற நல்ல அடித்தளத்தை சரியாக பயன்படுத்தி கொள்ளாமல், அவர் மனம் போன போக்கில் கதை கருக்களை கொன்று, கொத்து கரி போட்ட சமயம். ஆனாலும், ஜேம்ஸ் பாண்டு போன்ற கதாபாத்திரத்தின் துணையுடன், ராமஜெயம் காலத்தில் அறிமுகமான மற்ற கதாபாத்திரங்களின் மீதம் உள்ளம் கதைகளோடு, இன்னும் பல உலக புகழ் பெற்ற கதாநாயகர்களை அறிமுக படுத்தியதால், இதை வசந்த காலம் என்று கொள்ளலாம்.

இதன் கால கட்டம் எது வரை என்பதில் கட்டாயம் காமிக்ஸ் ஆர்வலர்களிடையே வெவ்வேறு கருத்துக்கள் எழலாம். ஆனால் என்னை பொறுத்த வரை, ஐரோப்பா கதைகள் மட்டும் இல்லாமல், ஏற்கனேவே இந்திரஜால் காமிக்ஸ் மூலம் தமிழ் ரசிகர்களுக்கு அறிமுகம் ஆகி இருந்த அமெரிக்கா கதாபாத்திரங்களை (King Features Syndicate) துணைக்கு அழைத்து கொள்ளப்பட்ட இதழ் 288 வரையிலான ராணி காமிக்ஸ், இவ்வட்டத்துக்குள் சரியாக பொருந்தும்.

ஏற்கனவே வெளியான கதாநாயகர்களுடன், இக்காலத்தில் வெளி வந்த புகழ் பெற்ற கதாநாயகர்கள்:

தில்லான் பக் ஜோன்ஸ் சிஸ்கோ கிட் மாடஸ்டி பிளைசி மாயாவி

Thillon Buck Jones Cisco Kid Modesty Blaise Phantom

ஃபிளாஷ் கார்டன் ரிப் கிர்பி மான்டிரேக் முரட்டு காளை கார்த்

Flash Gordon Rip Kirby Mandrake Garth

இவர்களில் எனக்கு பிடித்த கதாபாத்திரம் பற்றி சொல்லவும் வேண்டுமா, எல்லோரையும் போல:

மாடஸ்டி பிளைசி (அழகு, வீரம், மெல்லிய நட்பு கலந்த பெண்ணோவியம்)

மாயாவி (நம்மை கானகங்களுக்கே கொண்டு செல்லும் கதை பாங்கு)

மான்டிரேக் (அவர் மாளிகையை அடைய கடக்கும் முஸ்தீபுகள் போதாதா?)

இருண்டக்காலம்: # 289 (ஜூலை '96) - # 500 (ஏப்ரல் '05)

ராணி காமிக்ஸ் என்ற சகாப்தத்திற்கு சாவு மணி அடிக்க தொடங்கிய கால கட்டம். அதற்க்கு முத்தாய்ப்பு வைப்பது போல, "கரும் புலி" என்ற கதாநாயகர் அறிமுகம் ஆனது 289 வது இதழில் தான். இவருக்கு போட்டியாக வடக்கில் வெளியான இன்னும் பல மொக்கை கதாபாத்திரங்களை தேடி பிடித்து தமிழ் காமிக்ஸ் ஆர்வலர்களை திரு.அ.மா.சாமி வெறுப்பேற்றி ஓட வைத்த தருணம்.

போதா குறைக்கு, வாசகர்கள் மனதில் நீங்கா இடம் பிடித்து இருந்த 1990 க்கு முந்தய ராணி காமிக்ஸ்களை திரும்பவும் மறுபதிப்பு என்ற பெயரில் தரம் குறைத்து வெளியிட்ட கால கட்டம். கடைசி நேரத்தில், வண்ண மயமாக இதே கதைகளை மூன்றாம் பதிப்பு வேறு பதித்து, பொறுமையை மிகவும் சோதித்த காலமும் இதுவே. ராணி காமிக்ஸின் தரம் குறைய காரண கர்த்தாவான திரு.அ.மா.சாமி, அதை புதைகுழியில் தள்ளும் 500 வது இதழ் வரை பொறுப்பேற்று இருந்தது ஒரு கரிய உண்மை.

இக்காலத்தில் வெளி வந்த "புகழ் (?!!!)" பெற்ற கதாநாயகர்கள்:

கரும்புலி ஜடாயு இந்திய டார்ஜான் டைசன் அக்னிபுத்ரா

Karum Puli Jadaayu Tyson Agniputra

தயவு செய்து, இதில் எனக்கு பிடித்த கதாபாத்திரங்கள் என்னவென்று கேட்டு வெருபேற்றாதீர்கள், நண்பர்களே :)

எதை பதிப்பது - எதை விடுவது என்று தெரியாமல் திரு.அ.மா.சாமி, ஒரு கட்டத்தில் உலக புகழ் பெற்ற தோர்கள், மற்றும் ஹீ-மேன் கதாபாத்திரங்களை கூட ஒரு சில இதழ்களில் தோன்றி மறைய வைத்தார். வண்ணமிகு இதழ் என்று கூறி கொண்டு கடைசி கட்டங்களில் வெளி வந்த குப்பை ராணி காமிக்ஸ்களில் தீட்டப்பட்ட வண்ணம், நமது வீட்டு சிறுவர்கள் வரையும் ஓவியத்தை விட கேவலமாக (?!!!) வெளியானது, ராணி குழுமத்தினர், ராணி காமிக்ஸ் மேல் கொண்டு இருந்த "காதலை" பறை சாற்றும்.

தரத்தில் மட்டும் அல்ல, புத்தக வடிவைமப்பில் கூட பிரதிபலித்தது அந்த "காதல்". வள வள அட்டை போய் "ராணி முத்து" தரத்தில் ஒரு பேப்பர் அட்டை. புத்தக அளவு குறைந்து ரெடிமேட் கைக்குட்டைக்கு ஈடாக மாறியது. இப்படி கூறி கொண்டே போகலாம். ஆனால் குறைகள் மட்டுமே வாழ்கை அல்லவே.

காமிக்ஸ் ஆர்வலர்கள், ராணி காமிக்ஸின் அந்திம காலத்துக்கு முந்தய நேர்த்தி குறைந்த வெளியீடுகளை வெறுத்து ஒதுங்கினாலும், தொடர்ந்து 21 ஆண்டுகள் தங்கு தடையில்லாமல் மாதம் இருமுறை, நாள் தவறாமல் வெளிவந்த ஒரே தமிழ் காமிக்ஸ் என்ற பெருமை ராணி காமிக்ஸ் மட்டுமே சொந்தமாகும்.

மாதம் 1, மற்றும் 15 என்று புத்தகத்தில் குறிப்பிட்டு இருந்தாலும், ஒரு நாள் முன்னேயே தவறாமல் கடைகளில் கிடைத்த ஒரே இதழ். என் அண்ணனுக்கும் எனக்கும் காலையில் யார் முதலில் எழுந்து கடைக்கு சென்று புத்தகம் வாங்கி முதலில் படிப்பது என்றே ஒரு போட்டி கூட இருந்தது. எப்பவும் போல தூங்கு மூஞ்சி ஆனா எனக்கு அது சாத்திய படவில்லை.

ராணி காமிக்ஸ் தனது பயணத்தை முடித்து கொண்ட போது வருத்தம் ஏற்பட்டாலும், உள்ளுக்குள் இனிமேலும் அதன் சகாப்தத்தின் கொலையை பார்க்க மாடோம் என்ற நிம்மதி கட்டாயம் இருந்தது.

கடைசி கால கட்டங்களில் ராணி காமிக்ஸ் வாங்குவதையே நிறுத்தி வைத்து இருந்த நான், 500 வது இதழை நெருங்கி கொண்டு இருந்த சமயத்தில் வெறும் சேகரிப்புக்கு மட்டும் வாங்குவதற்காக, நண்பர் ஒருவரின் அறிவுரைக்கு ஏற்ப, 2 வருட சந்தா கூட கட்டினேன். சந்தா ஆரம்பித்த இரண்டே மாதங்களில் ராணி காமிக்ஸ் "சுபம்" போட்டு விட, அந்த சந்தா பணமும் "ஸ்வாகா" ஆனது ஒரு தனி கதை.

எது எப்படியோ, ராணி காமிக்ஸ் இன்றும் சில வாசகர்களிடையே பசுமையான சில நினைவுகளை விட்டு சென்று இருப்பது உண்மையே. இந்த வலைபூ மூலம் அந்த எண்ணங்களை நினைவு கூறுவதே முதற் நோக்கம். முதல் 90 இதழ்கள் வெளி வந்த காலம் பொற்க்காலம் என்பதால், இன்னும் பல வலை பதிவுகளுக்கு நமக்கு குறை கூறும் எண்ணம் இருக்க போவது இல்லை. அதற்க்கு பிறகு வரும் சோக கட்டத்தை மறந்து, இந்த சுகமான எண்ணங்களிடையே சஞ்சரிக்க, நீண்டு போன முன்னோட்டத்துக்கு இத்துடன் முற்றுபுள்ளி வைத்து விட்டு, புத்தாண்டு முதல் ஆரம்பிப்போம்.

அதற்க்கு முன் உங்கள் மனம் கவர்ந்த கதாநயகர்கள் இவற்றில் யார், ஏன் என்று ஏன் நீங்கள் பதிய கூடாது? வோட்டும் போடலாமே.

சிரமம் கொண்டு பதிவுகள் பதிந்தாலும், ஏனோ தங்கள் கருத்துக்களை அந்த அந்த பதிவுகளில் பதிவதில், வருகை தரும் பெரும்பாலானோரிடம் ஒரு வித தயக்கம் உள்ளது எல்லோருக்கும் தெரிந்த உண்மையே. இந்த பழக்கத்தை ஒழித்து, மற்றவர்களையும் ஆர்வத்துடன் பங்கெடுக்க வைக்க என்ன மாற்றங்கள் மற்றும் புதுமைகள் செய்யலாம், என்றும் உங்கள் கருத்துக்களை தெரிந்து கொள்ளவும் ஆசை. கண்டிப்பாக இது சம்பந்தமான உங்கள் என்னோட்டங்களையும் பதியுங்கள்.

கூடவே, இந்த பதிவை பற்றிய உங்கள் கருத்துக்களை படிக்கும் ஆர்வத்துடன், இப்போதைக்கு விடை பெறுகிறேன்.

பி.கு.:

1. இந்த பதிப்பில் இடம் பெற்றுள்ள அனைத்து சித்திரங்களும், நமது ராணி காமிக்ஸ் பதிப்புகளின் வெவ்வேறு கால இதழ்களில் இருந்து, பிரதி எடுத்து, மேம்படுத்தி உபயகோபடுதப்பட்டுள்ளது.

2. நண்பர் சிவ், சென்ற பதிவின் பின்னூட்டத்தில், அன்றைய கால இந்திரஜால் காமிக்ஸ் தமிழுக்கு ஆற்றிய பங்களிப்பை பற்றி பதியாததை சுட்டி காட்டி இருந்தார். உண்மை தான், கிட்ட தட்ட 1980 ல் இருந்து 1989 வரை தமிழில் மொழியாக்கம் செய்து அவர்கள் வெளியிட்ட இதழ்கள், ஒரு காமிக்ஸ் பொக்கிஷம்.

ஆனால் அதன் மொழிபெயர்ப்பு ஏனோ என்னிடம் மற்ற தமிழ் காமிக்ஸ்கள் போல ஒரு தாக்கத்தை ஏற்படுத்த வில்லை என்பதே உண்மை. தமிழர்கள் முழுமையாக பங்கெடுக்காத ஒரு இதழ் என்பது அதற்க்கு ஒரு காரணமாக இருந்து இருக்கலாம். ஆனாலும், முழு வண்ணத்தில், வித்தியாசமான புகழ் பெற்ற கதாநாயகர்களை, தொடர்ந்து வெளியிட்ட இதழ் என்ற ஒரு தனிசிறப்பான மகுடம் அவர்களுக்கு மட்டுமே உரித்தானது.

முன்னோட்டம் - I

2008-12-17T08:53:00.000-08:00

காமிக்ஸ் நண்பர்களே, வணக்கம். சுய புராணம் முடிந்தது, அடுத்தது ராணி காமிக்ஸ் பற்றிய மலரும் நினைவுகளில் திளைக்கும் முன்பாக, தமிழ் காமிக்ஸ் வரலாற்றை சற்று புரட்டி பார்த்தால், ராணி காமிக்ஸ் அதற்கு அளித்த பங்களிப்பை உணர்ந்து கொள்ள ஏதுவாக இருக்கும் என்பது என்னுடைய தாழ்மையான கருத்து. எனவே இந்த முன்னோட்டம்.

தமிழ் காமிக்ஸ்களின் மூலம், 1972 முதல் வெளி வர தொடங்கிய முத்து காமிக்ஸ் என்று சொன்னால் மிகையாகாது. (அட்டை பட உபயம்: முத்துவிசிறி)

"முத்து பைன் ஆர்ட்ஸ்" என்ற பெயரில் (இன்றைய பிரகாஷ் பதிபகத்தினர்), திரு.முல்லை தங்கராசனை பொறுப்பாசிரியராக கொண்டு, வெளி வந்த முத்து காமிக்ஸ்.

அதற்க்கு முன்பு வரை பத்திரிக்கை அல்ல வார-மாத இதழ்களில் பக்க நிரப்பிகலாகவும்-ஒட்டு சுருள்கலாகவும் உபயகொப்படுத்தப்பட்டு கொண்டு இருந்த சித்திரகதைகளுக்கு, ஒரு தமிழ் காமிக்ஸ் எப்படி இருக்க வேண்டும் என்ற வழிவகையை முதலில் அறிமுகப்படுத்தியது. அதற்க்கு அவர்களுக்கு உதவியது இங்கிலாந்தை சேர்ந்த ஃபிலீட்வே (Fleetway) பதிப்பகம்.

இன்று நம் மக்களுக்கு அறிமுகம் ஆகி உள்ள அமெரிக்கன் சூப்பர் ஹீரோ காமிக்ஸை விட, கதாபாத்திர சித்தரிப்பு மற்றும் கதை களத்தில் சிறந்து விளங்கிய ஐரோப்பா காமிக்ஸ்கள், தமிழக வாசிப்பாளர்களிடம் பிரபலம் அடைந்ததில் ஆச்சர்யம் இல்லை. அந்த கால கட்டத்தில் முத்து காமிக்ஸ் மேல் இருந்த ஒரே குறை, சீராக அதன் பதிப்புகள் வெளியிட முடியாத இயலாமையே. அந்த குறை தீர 12 வருடங்கள் எடுத்து கொண்டது.

1984 தமிழ் காமிக்ஸ் வரலாற்றில் பொன் எழுத்துகளில் பதிக்க பட வேண்டிய ஒரு வருடம். இந்த வருடத்தில் தான் மூன்று புதிய தமிழ் சித்திரகதை புத்தகங்கள் தங்கள் பயணத்தை ஒரே நேரத்தில் தொடங்கின (ஜூலை ‘84).

	முதலாமாவது, முத்து காமிக்ஸ் பதிப்பகத்தினரின் இன்னுமொரு படைப்பு - லயன் காமிக்ஸ், திரு.S.விஜயனை பொறுப்பாசிரியராக கொண்டு, தெற்காசியாவின் பட்டாசு தலைநகரமான சிவகாசியில் இருந்து.
	இரண்டாவது, அவர்களுக்கு போட்டியாக அவர்கள் ஊரில் இருந்தே வெளிவந்த மேத்தா காமிக்ஸ், (இச்சமயத்தில் கட்சி தாவி இருந்த) திரு.முல்லை தங்கராசனை பொறுப்பாசிரியராக கொண்டு.
	மூன்றாவது, பிரபலமான தின-தந்தி பதிபகத்தினரின் அரவணைப்பில் உருவான நமது வலைபூ கதாநாயகர் - ராணி காமிக்ஸ், தமிழக தலைநகர் சென்னையிலிருந்து. இதற்க்கு பொறுப்பாசிரியராக நியமிக்க பட்டவர் திரு.S.ராமஜெயம்.

வித்தியாசமான கதாநாயகர்கள், கதை தரம், புத்தக அமைப்பு, வள-வள அட்டை படங்கள், கண்ணை பறிக்கும் ஓவிய அச்சு, தரமான மொழிபெயர்ர்ப்பு, என்று முதல் முறையாக ஒரு மும்முனை போட்டியை தமிழ் காமிக்ஸ் ரசிகர்கள் பார்க்க நேர்ந்தது. இந்த போட்டியில் மேத்தா காமிக்ஸ் ஆரம்ப வருடங்களிலேயே கடை மூடி விட, ராணி காமிக்ஸ் மற்றும் லயன் காமிக்ஸ் இடையே ஒரு நேருக்கு-நேர் போட்டி உதயமானது. இடைப்பட்ட காலத்தில், சில முறை திடீர் திடீர் என்று உதயமாவதும் மறைவதுமாக மேத்தா காமிக்ஸ் கண்ணாம்பூச்சி ஆடி கொண்டு இருந்தது.

ஆரம்பத்திலேயே லயன் காமிக்ஸை முந்தி கொண்டு, புகழ் பெற்ற ஜேம்ஸ் பாண்டு (James Bond 007) கதைகளை தன் வசம் செய்த ராணி காமிக்ஸ், முத்து மற்றும் லயனின் பாரம்பரிய ஃபிலீட்வே பதிப்பகத்திலும் கை வைத்து, குதிரை வீரர்கள் (Cow-Boy), மற்றும் துப்பறியும் சாகசங்களையும் அதன் இதழ்களில் வெற்றி நடை போட வைத்தது.

இந்த ஆரம்ப கட்ட போட்டியில், ராணி காமிக்ஸ் முன்னிலை படுத்தப்பட்டதற்கு முதற்-முதல் காரணம், தின-தந்தி என்ற பெரிய குழுமத்தின், அசைக்க முடியாத முகவர் வட்டம் (விற்பனை பிரதிநிதிகள்). நகரங்கள் முதற் கொண்டு, பட்டி-தொட்டி, பெட்டி கடை எங்கும் தங்கள் காமிக்ஸ்களை சரளகமாக விற்பனை செய்ய அது உதவியது.

இன்னொரு காரணம், அதன் விலை. லயன் காமிக்ஸ் மற்றும் முத்து காமிக்ஸ் தனது அமைப்பு, மற்றும் கதை நீளத்தின் அடிப்படையில் அதன் விலையை அவ்வப்போது மாற்றி கொண்டு இருந்த போது, அதே அளவு மற்றும் பக்கங்கள் கொண்டு, ரூ.1.50 என்ற விலையில் கிட்ட தட்ட 4 வருடம் சீராக வெளியிட்ட ராணி காமிக்ஸ், சாமானிய வாசகனுக்கு சென்று அடைவதில் சிக்கல் ஏற்பட வில்லை. அதற்கு பிறகும் கூட ரூ.2 விலையை 10 வருடங்கள் தொடர்ந்த சாதனையும் அவர்களுக்கே உரித்தாகும். சீரான விலையுடன், அதே தரத்தில் வெளி வந்த ராணி காமிக்ஸ், ஒரு வழியாக வெகு ஜன வாசகர்களின் பிரியமான இதழனாது, நான் உட்பட. அதன் விளைவே இந்த வலைபூ.

ராணி காமிக்ஸ் எவ்வளவு தான் சாதனைகள் செய்தாலும், கடைசியில் இன்று விஞ்சி நிற்பது முத்து காமிக்ஸ் மற்றும் லயன் காமிக்ஸ் மட்டுமே (அதற்க்கு காரணம் பின்-புலத்தில் திரு.சவுந்தரபாண்டியன், மற்றும் திரு.விஜயன் அவர்களின், அசையாத காமிக்ஸ் மேல் கொண்ட காதல்). கழுதை தேய்ந்து கட்டெறும்பான கதையாக, கால போக்கில், கதை தேர்வு, மற்றும் மோசாமான மொழிபெயர்ப்பில் ராணி காமிக்ஸ் உழன்று, வாசகர்கள் மனதில் இருந்து அறவே ஒழிந்து போனது.

இதன் அடிப்படையில் ராணி காமிக்ஸ் வரலாற்றை திரும்பி பார்க்கும் போது, அதை மூன்று கால கட்டங்களில் வரையறுக்கலாம்:

பொற்க்காலம்
வசந்தக்காலம்
இருண்டக்காலம்

இந்த கால கட்டங்கள் ராணி காமிக்ஸ்க்கு எவ்வகையில் பொருந்தும் என நான் ஒரு எண்ணம் வகுத்து இருக்கிறேன். அதை பற்றி அடுத்த பதிவில் விவரிக்கிறேன். என்னடா, ஏதோ மெகா சீரியல் போல இழுவையா - என்று எண்ண வேண்டாம். காமிக்ஸ் பற்றி பேச ஆரம்பித்தாலே, நேரம் போவது தெரியாது (குறைந்த பட்சம், என்னை பொறுத்த வரை). அது எழுத்து வடிவத்திலும் தொடர்ந்த காரணத்தால், முன்னோட்டம் நீண்டு போயிற்று. வேறு வழியில்லாமல், இரண்டு பதிவாக போட வேண்டிய நிலைமை. எனவே முன்னுரை நிறைவு பதிவு, சில நாட்களில் வெளியிடப்படும்.

அதற்க்கு முன், இந்த முன்னோட்ட பாகத்தை பற்றியும், உங்கள் எண்ணங்களில் ராணி காமிக்ஸ் கால கட்டம் எவ்வகைபடும் என்றும், நீங்கள் ஏன் உங்கள் கருத்துக்களை பதிய கூடாது?

உங்கள் கருத்துக்களை படிக்கும் ஆர்வத்துடன், இப்போதைக்கு விடை பெறுகிறேன்.

பி.கு.: என்னுடைய முந்தய பதிவை வந்து பார்த்து தங்களது கருத்துக்களை பதிந்த அனைவருக்கும் நன்றி. நாள் தோறும் வருகை தரும் எண்ணற்ற அன்பர்களிடம், அடுத்த பதிவு போட ஏற்பட்ட கால தாமதத்துக்கு மன்னிக்க வேண்டுகிறேன். கூட்டணி என்றாலே பிரச்சனை தான், அரசியலிலும் சரி, பதிவுலகத்திலும் சரி.

கூட்டு வலைப்பதிவு என்று கூறி விட்டு நான் மட்டுமே வண்டி ஓட்ட கூடாது என்ற எண்ணத்தில், ஏனைய வலைப்பூ தமிழ் காமிக்ஸ் அன்பர்களை அழைத்து, ஒரு மித்த கருத்து கொண்டு வரவே இக்கால தாமதம். அதற்க்கு இன்னும் நேரம் கூடவில்லை. அது வரை இரட்டை மாட்டு வண்டி தான் கதி, எனவே தாமதம் ஏற்படின் மன்னிக்கவும்.

சாகச வீரர் ஜானி	மன்னர் பீமா	இன்ஸ்பெக்டர் ஆசாத்	புரட்சி பெண் ஷீலா
Johnny Hazard	King Beema	Inspector Aazaad	Axa

ப்ரூஸ் லீ	பில்லி	ராயன்
Bruce Lee	Billy	Buck Ryan

தில்லான்	பக் ஜோன்ஸ்	சிஸ்கோ கிட்	மாடஸ்டி பிளைசி	மாயாவி
Thillon	Buck Jones	Cisco Kid	Modesty Blaise	Phantom

ஃபிளாஷ் கார்டன்	ரிப் கிர்பி	மான்டிரேக்	முரட்டு காளை கார்த்
Flash Gordon	Rip Kirby	Mandrake	Garth

கரும்புலி	ஜடாயு	இந்திய டார்ஜான் டைசன்	அக்னிபுத்ரா
Karum Puli	Jadaayu	Tyson	Agniputra